Alakólde dýatlonnan respýblıkalyq týrnır ótti
ÚRJAR. QazAqparat - Shyǵys Qazaqstan oblysynyń Úrjar aýdanynda dýatlonnan «Alakól - 2018» ashyq respýblıkalyq týrnıri ótti, dep habarlaıdy QazAqparat tilshisi.
QR Mádenıet jáne sport mınıstrligi uıymdastyrǵan dýatlon jarysyna 100-den asa adam qatysty. Olar aldymen 3 shaqyrymǵa júgirip, artynsha 10 shaqyrymdy velosıpedpen júrip ótti. Keıin taǵy 2 shaqyrym júgirdi.
Jarysqa QR Mádenıet jáne sport mınıstrligi Sport jáne dene shynyqtyrý isteri komıtetiniń tóraǵasy Serik Jarasbaev, QR Ulttyq olımpıadalyq komıtetiniń Sport dırektsııasynyń basshysy Elsııar Qanaǵatov, «Qazaqstan barysy» Aıbek Nuǵymarov, halyqaralyq dárejedegi sport sheberi Dıas Ahmadıev te qatysty.
«Bizdiń maqsatymyz - qazaqtyń qasıetti kıeli jerlerin nasıhattaý. Alakól elimizdiń ádemi ári keremet jerleriniń biri. Aýasy, sýy óte tamasha. Aıdyndy Alakólde osyndaı jarystardy jyl saıyn ótkizý josparda bar», - dedi Serik Jarasbaev.
Áýeli jarys jolyna 30-34 jas sanatyndaǵylar synǵa tústi. Nátıjesinde úrjarlyq, halyqaralyq dárejedegi sport sheberi Erdos Ahmadıev birinshi oryndy ıelendi. Al jastar arasynda kóldeneńdik Nurtaı Baıtikov pen 19-23 jasqa deıingiler arasynda Qabanbaı aýylynyń turǵyny Aqjol Salıevter chempıon atandy.
Aıta keteıik, 55-59 jas aralyǵyndaǵy erler arasynda reseılik Asqabyl Samashev pen 50-54 jastaǵylar arasynda úrjarlyq Dýlat Imanqajylar birinshi oryndarǵa taban tiredi. Sonymen birge, 29 jasqa deıingi qyzdar arasynda óskemendik, skaıdaıvıng sport túriniń birneshe márte jeńimpazy Anastasııa Mavrına birinshi oryn aldy.
«Qarsylastar myqty boldy. Biraq bar kúshimdi salyp, ózimdi dáleldedim. Jarysty uıymdastyrýshylarǵa úlken rahmet», - dedi altyn júldeger Erdos Ahmadıev.
Aıta keterligi, jarys sońynan dýatlonǵa qatysýshylar arasynda lotoreıa oınatylyp, Aleksandr Vınokýrovtyń velosıpedi, Serik Sápıev pen Baqtııar Artaevtyń qolǵaby, Olga Rypakovanyń jeıdeleri qoıyldy.
