Alakólde demalýshylardyń sany bir jarym esege artty
ASTANA. QazAqparat - Bıylǵy shomylý maýsymynda Alakólge at arytyp kelgen halyqtyń sany bir jarym esege deıin artyp, 400 myń adamnan asyp jyǵylǵan, dep habarlaıdy altaynews.kz
Alakóldiń jaǵalaýyn abattandyrý jumystary báseńdemeıdi. Bul týraly Úrjar aýdanyna jumys sapary barysynda oblys ákimi Danıal Ahmetov málim etti.
Aıta keteıik, sońǵy ýaqytta aımaq basshysy jaǵalaýdyń abattandyrylýy, týrısterge kórsetiletin qyzmet sapasynyń artýy, kólge deıingi joldyń jónge keltirilýi sııaqty máselelerdi tikeleı óz baqylaýyna alyp otyr. Ras, bir jylǵa jeter-jetpes ýaqyt ishinde aımaq basshysy kól jaǵasyna osymen úshinshi ret at basyn tiredi. Alǵash saparlarynda munda oryn tepken 150-ge jýyq demalys bazasynyń ıelerimen kezdesip, birqatarynyń jumysyn synǵa alǵan aımaq basshysy bul joly da biraz jaıtqa kóńili tolmaıtynyn jetkizdi.
«Bılik Alakóldegi demalys bazalarynyń ıeleri aldyndaǵy ýádesin buljytpaı oryndap keledi. Eń basynda aıtylǵandaı, jaǵalaýdy abattandyrýǵa 550 mıllıon, jol jóndeýge 1,5 mıllıard teńge bóldik. Barlyqtaryńyz kórip júrgendeı, qazir bul jer úlken qurylys alańyna aınaldy, kól jaǵasynda jumys qaınap tur. Alaıda, osynyń bárin kóre tura, keıbir kásipkerler áli de jaıbasarlyǵyn qoımaı keledi», - dedi oblys ákimi Danıal Ahmetov kásipkerlerdiń basyn qosqan kezekti jıynda.
Aımaq basshysy aıtqandaı, kóldiń aınalasy kún sanap jergilikti turǵyndar men qonaqtardyń kóz aldynda erekshe kelbetke enip keledi. Burynǵy eski lashyqtar men vagondardyń ornynda qazir kól jaǵalaýynda keskini kóz tartar tamasha qonaq úıler jaıǵasqan. Ortalyq kósheniń biri kúrdeli jóndeýden ótip, arbatqa aınalǵan. Oqys oqıǵalardyń aldyn alý maqsatynda sýda da, jaǵalaýda da qaýipsizdik sharalary kúsheıtilgen. Demalys bazalary qalashyǵyndaǵy qoǵamdyq tynyshtyqty birneshe polıtsııa pýnkti táýlik boıy kúzetedi. Osyǵan qaramastan, kásipkerlerdiń birsypyrasy áli de ózine tıesili telimde anyqtalǵan zańbuzýshylyqtardy joımaǵan. Úrjar aýdanynyń ákimi Serik Zaınýldınniń aıtýynsha, búginde jaǵalaýdaǵy 147 demalys nysannyń 113-i barlyq talapqa saı. Taǵy 10 nysanda anyqtalǵan zańbuzýshylyqtar joıylý ústinde.
Al qalǵan 24 jer ıesi kemshilikti joımaq túgili, saýsaqtaryn da qımyldatpaǵan. Endi mundaı jaýapsyz kásipkerlerge eshqandaı jeńildik jasalmaıdy. Muny jıyn barysynda oblys ákimi qadap aıtty.
