Alakólde demalýshylardan koronavırýs juqtyrmaǵandyǵy týraly anyqtama talap etiledi
ÓSKEMEN. QazAqparat – Shyǵys Qazaqstan oblysynda koronavırýs pandemııasyna baılanysty demalys oryndarynyń ıeleri men týrıster birqatar normatıvterdi saqtaý kerek, dep habarlaıdy QazAqparat tilshisi.
ShQO Aqparat ortalyǵynyń málimetinshe, demalýshylar jaǵajaı aımaǵynda kem degende eki metr qashyqtyqty saqtaýy tıis. Demalys bazalaryndaǵy jatyn oryndar men úıshikterdiń tek 50%-y jalǵa beriledi. Sondaı-aq kelýshilerden sońǵy 7 kún ishinde alynǵan koronavırýs juqtyrmaǵandyǵy týraly anyqtama qaǵaz bolýy shart. Bir otbasynda 1 adamnyń anyqtamasy bolsa jetkilikti. Bul týraly oblystyń bas memlekettik sanıtar dárigeriniń qaýlysynda aıtylǵan.
Barlyq demalys oryndary dezınfektsııalyq jáne jeke qorǵanys quraldarymen, dene qyzýyn qashyqtan ólsheıtin termometrlermen qamtylýy qajet. Demalýshylardyń ózderinde de jeke qorǵanys quraldary bolǵany abzal. Kelýshilerge medıtsınalyq kómek kórsetý úshin Alakóldiń jaǵasynda Qabanbaı aýylyndaǵy dárigerlik ambýlatorııadan táýlik boıy jumys isteıtin 12 tósek-oryn daıyndaldy. Sonymen qatar kóldiń boıyna 24 saǵattyq travmatologııa pýnkti ornatylǵan. Qajet bolǵan jaǵdaıda mamandandyrylǵan medıtsınalyq kómek kórsetý úshin Óskemen jáne Semeı qalalarynan mamandar jetkiziledi. Patsıentterdi Úrjar aýdanyndaǵy aýrýhana qabyldaýǵa daıyn. Onda eki ókpeni jasandy jeldetý apparaty bar.
Esterińizge sala ketsek, Úrjar aýdanyndaǵy Alakól aımaǵy 13 maýsymnan bastap demalýshylardy qabyldaıdy.
ShQO Týrızm jáne syrtqy baılanystar basqarmasy basshysynyń orynbasary Inara Bodýkovanyń aıtýynsha, bıyl jaǵalaýyna kontsert alańy salynady.
