Alakólde demalý shetelden qymbat pa – ákim jaýap berdi

TALDYQORǴAN. KAZINFORM – Jetisý oblysy Alakól aýdanynyń ákimi Almas Ábdınov Alakóldegi demalys quny týraly pikir bildirdi.

Aýdan ákimi áleýmettik jelide taraǵan «Mysyrda demalý otandyq kýrortqa qaraǵanda arzan» degen pikirge qatysty oıyn aıtty.

– Bul – naryq. Bireý Mysyrǵa barady. Bul – olardyń tańdaýy. Múmkin oryndy da shyǵar. Biraq men Alakólde demalý qymbatyraq dep aıta almaımyn. Bári qyzmet kórsetý deńgeıi men demalýshylardyń qalaýyna baılanysty. Iá, bizde qyzmet sapasyna qaraı baǵasy joǵary demalys oryndary bar, biraq úsh mezgil tamaǵymen kúnine 17–20 myń teńge bolatyn qoljetimdi oryndar da joq emes. Táýligine 100 myń teńgeden asatyn nómirler de bar – bul basqa sanat. Jalpy baǵa 15 myń teńgeden 300 myń teńgege deıin ózgeredi. Bireýge bul qymbat kórinýi múmkin, al bireý úshin oryndy. Iá, qymbat qonaqúıler bar, biraq olardyń baǵa qoıýyna tyıym sala almaımyz. Múmkin el boıynsha belgili bir baǵa saıasaty nemese normatıvter ázirleý qajet bolar. Ázirge bul – naryq. Qarasańyz, tipti qymbat qonaqúılerde de bos oryn joq, - dedi Almas Ábdınov.

Sonymen qatar ákim Úsharal áýejaıy men temirjol vokzalynan Aqshı jáne Kóktuma kýrorttyq aımaqtaryna deıingi taksı baǵasynyń qymbattaýyna shaǵymdanǵan týrısterdiń pikirine de toqtaldy. Onyń aıtýynsha, máseleni sheshý úshin Aqshı aýylynan turaqty avtobýs baǵytyn iske qosýǵa sýbsıdııa bólingen, qazir konkýrs ótkizilip jatyr. Odan bólek birqatar qonaqúıler men demalys oryndary qonaqtaryn jetkizý qyzmetin uıymdastyrady — bul da olardyń qyzmet baǵasyna áser etedi.

– Taksı máselesi rasynda kúrdeli. Men taksı júrgizýshilerimen de sóılestim. Árqaısysynyń aıtary ártúrli. Olarǵa «jol jaqsy, benzın de qymbattap jatqan joq» deımin. Biraq bári qaıtadan naryqtyq qatynastarǵa tireledi. Olardyń resmı tirkelgen-tirkelmegenin suraımyn — bul kezde jaýaptan jaltaryp ketedi. Bul máselemen aınalysyp jatyrmyz. Óz tarapymyzdan baqylaý júrgizemiz, - dedi aýdan ákimi. 

Eske salaıyq, buǵan deıin Alakóldegi qaýipsizdik pen sanıtarııa máselesi Úkimet deńgeıinde qaralatynyn jazǵanbyz. 

Sondaı-aq Qazaqstan men Ázerbaıjan Alakólde shıpajaı keshenin salatynyn jazǵan edik.