Alakólde bir aıda joǵalyp ketken 95 bala tabyldy
SEMEI. KAZINFORM — Abaı oblysyndaǵy Alakól jaǵalaýynda bir aı ishinde polıtseıler adasyp ketken 95 balany taýyp, myńnan astam quqyq buzýshylyqtyń jolyn kesti.
Oblystyq polıtsııa departamenti baspasóz qyzmetiniń málimetinshe, týrıstik maýsym bastalǵaly beri tártip saqshylary Alakól jaǵalaýynda demalýshylardyń qaýipsizdigi men tynyshtyǵyn táýlik boıy qamtamasyz etip keledi.
Sońǵy bir aıda polıtseıler 110 habarlama men shaqyrtýǵa baryp, túrli jaǵdaılarǵa tap bolǵan ondaǵan týrıstke kómek kórsetti. Sondaı-aq adasyp ketken 95 bala ata-anasyna aman-esen qaıtaryldy.
— Qyzmet barysynda 1014 ákimshilik quqyq buzýshylyqtyń joly kesildi. Eń kóp tirkelgen quqyq buzýshylyqtar qoǵamdyq tártipti buzý jáne jol qozǵalysy qaǵıdalaryn saqtamaýǵa qatysty boldy. Kólikti mas kúıde basqarý derekteri az emes. Osy kezeńde polıtsııa qyzmetkerleri ishimdik iship kólik basqarǵan 24 júrgizýshini anyqtap, Qazaqstan Respýblıkasynyń zańnamasyna sáıkes jaýapkershilikke tartty, — delingen aqparatta.
Eske salsaq, osyǵan deıin TJM qyzmetkerleri Alakólde alty adamdy qutqarǵany habarlanǵan.
