Alakólde bıylǵy baǵa kóterilmeıdi - kásipkerler
ALMATY. QazAqparat - Alakóldegi demalys oryndarynyń ıeleri bıylǵy maýsymǵa daıyndyqtary týraly aıtty, dep habarlaıdy QazAqparat tilshisi.
«Týrısterdiń qatary kún sanap ósýde. Osydan úsh jyl buryn jylyna 205-300 adam keletin bolsa, ótken jyly bul san 700 myńǵa jetti. Bıyl 1 mln-ǵa deıin aparamyz. Alakóldiń emdik qasıeti bar ekenin barlyǵyńyz bilesiz. Qazaqstannyń barlyq aımaǵynan halyq demalýǵa ári densaýlyqtaryn túzeýge keledi» - dedi Almaty oblysy Aqshı aýylyndaǵy demalys ornynyń ıesi.
«Demalys orny ıeleri bıyl baǵany kótermeımiz» deıdi. Burynǵydaı bir adamǵa táýligine 5-12 myńnyń shamasy bolyp qala beredi.
«Bizde qart adamdar úshin belgileıtin baǵa - bes myń teńge. Munyń ishine 3 mezgil tamaǵy, jáne basqa da qyzmetter kiredi. Sondaı-aq týrısterge arnalǵan jattyǵý zaldary men medıtsınalyq pýnkt jumys isteıdi. Jasy kelgen kisilerdiń shıpajaıda demalýǵa múmkindigi bola bermeıtinin bilemiz, sol úshin de olardy jaıly demalys ornymen qamtamasyz etemiz. Sondaı-aq otbasylyq demalys úshin baǵasy 6,5 myńnan bastalatyn kottedj úıler men páterler bar. Árıne Túrkııadaǵydaı «all inclusive» ádisi bizge kele qoıǵan joq, degenmen jyldan-jylǵa qyzmet kórsetý sapasyn jaqsartyp kelemiz»-dedi ol.
Týrıster úshin negizgi másele kól jaǵalaýyna deıingi joldyń jaısyzdyǵy bolyp otyr. Alakól aýdany ákimdigi bıyl bul kemshilikterdiń orynyn toltyrýdy ýáde etti.
«Alakól jaǵalaýyna deıingi joldyń jaǵdaıy bizdi de alańdatyp otyr. Ózderińiz biletindeı, Taldyqorǵan men ShQO Qalbataý kentiniń arasyndaǵy joldyń qurylysy bastalyp ketti. Úsh jyl ishinde aıaqtalady degen jospar bar. 184 shaqyrymǵa sozylatyn Úsharal-Dostyq jolyn salý úshin bıýdjetten 42 mlrd 200 mln tenge bólindi. Jańa joldyń salynýymen qatar Taldyqorǵan men Úsharaldyń arasyn jalǵaıtyn áýejaıdy, Almaty jáne Astana temirjolyn qosa aıtqanda týrızm áleýetimiz jandanyp keledi»-dedi Alakól aýdany ákimi Álibek Jaqanbaev.
Demalys oryndary ıeleri 1 maýsymda bastalatyn sýǵa shomylý maýsymyn ashýǵa qyzý daıyndyq ústinde. Kól aýmaǵy tazalanyp, aǵash otyrǵyzý jumystary júrip jatyr. Qazirgi tańda kól mańynda 180 týrıstik nysan ornalasqan. Jaqyn arada olardyń sanyn 200 -ge jetkizemiz, dedi ákimdiktegiler.
Araılym Joldasbaı
