Alakólde bıyl 1,5 mln jýyq adam demalady degen jospar bar

NUR-SULTAN. QazAqparat – Alakóldiń týrıstik áleýetin damytý baǵytynda qolǵa alynǵan nysandar qurylysynyń ýaqytly aıaqtalýy erekshe baqylaýda bolýy kerek. Bul týraly Almaty oblysynyń ákimi Qanat Bozymbaev aýdanǵa sapary barysynda aıtty, dep habarlaıdy QazAqparat oblys basshysynyń baspasóz qyzmetine silteme jasap.

«Jaǵalaýdy abattandyrý jumystaryn jalǵastyryp jatyrmyz. Sonyń ishinde, Aqshı aýylynyń sýmen jabdyqtaý júıesi jańartyldy. Jyl sońyna deıin Úsharal qalasy áýejaıynyń ushyp-qoný jolaǵynyń, Qabanbaı-Kóktuma avtojolynyń jóndeýi aıaqtalady. «Qazaqstan temir jolymen» «Talgo» júrdek poıyzyn júrgizý týraly memorandýmǵa qol qoıdym. Bul reıster jergilikti bıýdjet esebinen sýbsıdııalanady»

, - dedi Qanat Bozymbaev.

Almaty oblysynda joldardyń 89%-y jaqsy jáne qanaǵattanarlyq jaǵdaıda bolsa, bul kórsetkish Alakól aýdanynda - 44,5% ǵana. Bıyl aýdandaǵy 32 km joldy qalpyna keltirýge 1,3 mlrd teńge bólindi.

Sondaı-aq, elektr qýatymen jáne sýmen jabdyqtaý problemalary da sheshimin taýyp jatyr.

Osyndaı sharalardyń arqasynda bıylǵy jaz maýsymynda Alakól kóliniń jaǵalaýyna 1,4 mln demalýshy keledi dep josparlanyp otyr. Oblys ákiminiń aıtýynsha, barlyq josparlanǵan obektiler qurylysynyń der kezinde aıaqtalýy erekshe baqylaýda bolýy kerek.

Buǵan deıin habarlaǵanymyzdaı, jazǵy demalys maýsymynda Alakól aımaǵyna 11 poıyz qatynaıdy.

Sondaı-aq, Alakól mańyndaǵy áýejaı jóndeýden ótip jatqany habarlanǵan.