Alakólde «bes juldyzdy» demalys kesheni ashyldy
TALDYQORǴAN. QazAqparat - Almaty oblysyndaǵy Alakól jaǵalaýynda «bes juldyzdy» demalys orny ashyldy. 4 mlrd teńge ınvestıtsııa tartylǵan keshen 450 adamǵa laıyqtalǵan. Ǵımarattyń ashylý saltanatyna óńir basshysy Amandyq Batalov qatysty, dep habarlaıdy QazAqparat tilshisi.
«Barshańyzdy zamanaýı kópsalaly «Kóktem Grand Resort» qonaqjaı kesheniniń ashylýymen quttyqtaımyn. Osy jyldyń mamyr aıynda Memleket basshysy Alakólge jumys saparymen kelgen kezinde kól jaǵalaýynyń ınfraqurylymyn damytý boıynsha atqarylyp jatqan jumystarǵa oń baǵasyn berdi. Sondaı-aq bul jumystardy ári qaraı da qarqyndy jalǵastyrý qajettigin atap ótti. Sondyqtan da búgingi ashylyp otyrǵan «bes juldyzdy» zamanaýı qonaqjaı kesheni - Elbasy tapsyrmasyn oryndaý jolyndaǵy taǵy bir qadam dep sanaýǵa bolady. Osy tusta dál osyndaı aýqymdy jobany júzege asyrǵany úshin jerlesimiz, kásipker Murat Ádilhanovqa erekshe alǵysymdy bildiremin», - dedi Amandyq Batalov.
Belgili bolǵandaı, kópsalaly qonaqjaı keshenindegi 107 bólmege 450 adam jaıǵasa alady. Onyń 97-si standartty, 4 - lıýks jáne bireýi prezıdenttik lıýks sanatyndaǵy bólmeler. Keshenniń jalpy aýmaǵy 16 ga, onyń 10 gektary saıabaqqa arnalǵan. Ǵımarat 5 qabattan turady. Jobanyń jalpy quny 4 mlrd teńge. Demalys ornynda 80 jańa jumys orny ashyldy. Munda týrısterge jazǵy terassasy bar kafe, monsha, karaoke klýby, dúken, balalardyń oıyn alańqaıy, voleıbol jáne ústel tennısiniń alańy, kitaphana, avtoturaq pen ózge de jaıly jaǵdaılar qarastyrylǵan.
Aıta keter bolsaq, Almaty oblysynyń ákimdigi Alakól jaǵalaýynyń ınfraqurylymyn damytýǵa úlken kóńil bólip keledi. Qazirgi tańda Alakól aýdanynda týrısterdi qabyldaýǵa ázir 213 nysan bar. Bul oblystaǵy barlyq týrıstik qyzmet kórsetetin nysandardyń 30% quraıdy (oblys boıynsha 701 nysan).
