Alakólde alǵash ret ámbebap qutqarý bólimshesi ashyldy

ASTANA. KAZINFORM – Alakól kýrorttyq aımaǵynda shomylý maýsymy qarsańynda alǵashqy ámbebap qutqarý bólimshesi iske qosyldy.

Ashylý rásimine Tótenshe jaǵdaılar mınıstri Shyńǵys Árinov pen Abaı oblysynyń ákimi Berik Ýálı qatysty. Іs-sharaǵa jergilikti turǵyndar da jınaldy.

Jańa bólimshe eki júzden astam demalys aımaǵynyń qaýipsizdigin qamtamasyz etedi. Jyl saıyn Alakólge ondaǵan myń týrıst keledi. Bul format óńir úshin jańa – buǵan deıin mundaı keshendi qutqarý qyzmeti bolmaǵan.

– Bul nysan demalýshylardyń qaýipsizdigin kúsheıtip, týrıstik ınfraqurylymdy damytýǵa serpin beredi. Qaýipsizdik joǵary bolǵan saıyn, ishki týrızm de qarqyndy damıdy, – dedi Shyńǵys Árinov.

Qutqarý bólimshesi tolyq qajetti tehnıkamen jabdyqtalǵan. Qyzmet táýlik boıy uıymdastyrylady. Qutqarýshylarǵa arnaıy avtokólikter, kater jáne jol talǵamaıtyn tehnıka berilgen. Ǵımaratta qyzmetkerlerdiń jumys isteýi men demalýyna barlyq jaǵdaı jasalǵan.

Bólimshe tek jaz mezgilinde ǵana emes, qysqy kezeńde de jumys isteıdi, sebebi bul ýaqytta da tótenshe jaǵdaılar týyndaýy múmkin.

Saltanatty rásim barysynda úzdik qyzmetkerler marapattalyp, is-shara sońynda qatysýshylar aǵash kóshetterin otyrǵyzdy.

Aıta keteıik, Úkimet basshysy Alakól jaǵalaýyn damytýdyń keshendi josparymen tanysty.