Alakólde 5 jyldan beri balalaryna alıment tólemegen er adamǵa úkim shyqty

TALDYQORǴAN. KAZINFORM — Jetisý oblysynyń prokýrorlary alımentti qasaqana tólemeı júrgen adamdy qylmystyq jaýapkershilikke tartty. 

Alakól aýdanynyń turǵyny 5 jyl boıy balalaryna alıment tóleýden jaltarǵan.

Nátıjesinde onyń 2,6 mln teńge kóleminde qaryzy jınalǵan.

Aýdan prokýratýrasy Qylmystyq kodekstiń 139-baby boıynsha sotqa deıingi tergeýge bastamashylyq jasap (balalardy asyraýǵa qarajat tóleý boıynsha mindetterin oryndamaý), ol sotqa jiberildi.

Sot úkimimen boryshkerge probatsııalyq baqylaý belgilene otyryp, 1 jyl merzimge bas bostandyǵy shekteldi.

Jyl basynan beri prokýratýra sharalarymen alıment tólemegen 206 adam ákimshilik jaýapkershilikke, 6 boryshker qylmystyq jaýapkershilikke tartyldy.

Jetisý oblysynyń prokýratýrasy kámeletke tolmaǵandardyń quqyǵyn qorǵaýǵa baǵyttalǵan túbegeıli shara qabyldaýdy jalǵastyrady.