Alakólde 300-den astam zańbuzýshylyq tirkelip, polıtsııa kúsheıtilgen rejımge kóshti

SEMEI. KAZINFORM – Alakóldiń Abaı oblysyndaǵy jaǵalaýynda polıtsııa kúsheıtilgen jumys rejımine kóshti.

Týrıstik maýsym bastalǵaly basty kúsh qoǵamdyq tártipti saqtap, sanıtarlyq qaýipsizdik pen kópshiliktiń jaıly demalysyn qamtamasyz etýge jumyldyrylǵan bolatyn.

Polıtsııa qyzmetkerleri sanıtarlyq-epıdemıologııalyq qyzmet ókilderimen birlesip, turaqty túrde reıd júrgizip keledi. Bul rette basty basymdyq – zań buzý áreketteriniń aldyn alý, zańsyz saýdamen kúres jáne jaǵalaýdy lastaý áreketteriniń jolyn kesý boldy.

- Jaz aıy bastalǵaly 300-den astam quqyqbuzýshylyq tirkelgen. Olardyń eń kóbi, ıaǵnı 141 jaǵdaı qoǵamdyq oryndy lastaýmen baılanysty, - dep habarlady Abaı oblysy polıtsııa departamentiniń baspasóz qyzmeti.

Sonymen qatar tyıym salynǵan aýmaqta mal jaıýdyń 74 jaǵdaıy, ruqsat etilmegen jerde saýda jasaýdyń 22 faktisi anyqtaldy, 15 jaǵdaıda aımaqty abattandyrý tártibi buzylǵan. Sondaı-aq ishimdik iship kólik júrgizgen 13 júrgizýshi ustalsa, 7 adam kólikti eshqandaı qujattarsyz basqarǵan, jaıaý júrginshiler 8 ret tártip buzǵan.

- Demalýshylarmen qoǵamdyq tártipti saqtap, qorshaǵan ortaǵa qamqorlyq tanytý týraly túsindirý jumystary júrgizilip jatyr,- dep qosty vedomstvo ókilderi.

Polıtsııa azamattardy Alakóldiń erekshe tabıǵatyn qalpynda saqtap, demalýshylardyń qaýipsizdigin qamtamasyz etý úshin kópshilik ortada ózin durys ustap, tazalyq saqtaýǵa shaqyryp otyr.

Osyǵan deıin Alakól jaǵalaýyndaǵy kemshilikter anyqtalyp, naqty tapsyrmalar berilgeni týraly jazdyq.