Alakól jaǵasyndaǵy lagerde myńnan asa oqýshy demalyp jatyr
ÚRJAR. QazAqparat - Shyǵys Qazaqstan oblysy, Úrjar aýdanynyń Alakól jaǵalaýynda «Úrjaraıym» saýyqtyrý demalys lagerinde jaz boıy 1440 bala demalady, dep habarlaıdy QazAqparat tilshisi.
Aıta keteıik, Alakól jaǵalaýyndaǵy lager 2011 jyly salynyp, 2012 jyly jumysyn bastaǵan bolatyn. Segiz aýysymnan turatyn demalys lageri búgingi kúni altynshy aýysymyn bastap ketti. Bir maýsymda 180 bala qamtylady.
Munda 1440 balanyń myńy respýblıkalyq, oblystyq, aýdandyq olımpıada jeńimpazdary, jetim, kópbalaly, turmys jaǵdaıy tómen otbasylardan shyqqandar. Olar bıýdjet qarajaty esebinen demalsa, qalǵan 440 oqýshy ata-anasynyń qarajatymen demalystaryn kóńildi ótkizýde.
Saýyqtyrý lagerinde bes tárbıeshi, dene shynyqtyrý jetekshisi, medbıke jumys isteıdi.
«Balalardyń jazǵy demalysyn uıymdastyrý qashan da mańyzdy. Lagerimizde olardyń ár kúnin qyzyqty ári ıntellektýaldy damytý jáne densaýlyǵyn nyǵaıtý maqsatynda kóptegen is sharalar uıymdastyramyz. Máselen, «Sý patshasy Súleımen», «Neptýn kúni», «Eki juldyz», «Fleshmob», «Jaıdarman», «Lager arýy», «Lager sultany», t.b. sharalar ótti. Sondaı-aq, munda «Magic English», «Babalar amanaty», «Sıqyrly boıaýlar», «Jas qalamger», «Sheber qoldar», «Jas qanat» mýzykalyq stýdııasy, «Jaıdarman» KTK jáne ár túrli sport túrlerinen atap aıtsaq, voleıbol, basketbol, toǵyz qumalaqtan kúnine bir retten úıirmeler jumys jasaıdy. Budan bólek, án bı saıystarynda ótkizemiz. Lager maýsymdary tildik baǵyttan basqa da salaýatty ómir saltyna baýlý, estetıkalyq tárbıe, azamattyq-patrıottyq jáne ulttyq tárbıe, sporttyq tárbıe baǵyttarynda jumys júrgizedi. Jalpy, balalardyń jazǵy jaqsy demalysy ol jyl boıyna jınaǵan qajetti kúsh-qýat»,- deıdi aǵa tálimgeri Shalqar Shakırov.
Oqýshylar «Úrjaraıymda» bos ýaqyttaryn maǵynaly ótkizip qana qoımaı, bilimderi men qabiletterin jetildirip qaıtady.
