Alakól jaǵasynda bes juldyzdy qonaq úı salynady
ASTANA. QazAqparat - Alakól jaǵasynda bes juldyzdy qonaq úı salynady. Bul týraly Shyǵys Qazaqstan oblysynyń ákimi Danıal Ahmetov aıtty, dep habarlaıdy «QazAqparat» HAA tilshisi.
«Biz ótken jyly Alakólde jumystyń alǵashqy kezeńin júrgizip, abattandyrýǵa 500 mln teńge jumsadyq. Alakólge almatylyqtar men ózge de oblystan adamdar ońaı jetýi úshin Jalańashkól stansasy men Qabanbaı aýylynyń arasyndaǵy jolǵa 1,3 mlrd teńgeniń jóndeý jumystary júrgizildi. Kelesi jyly da bul baǵytta qomaqty qarajat bólinetin bolady. Úlken jumystyń atqarylǵanyna Alakólde demalǵandardyń ózderi kýá. Jýyq arada ol jaqqa 5 juldyzdy qonaq úı salamyz», - deıdi OKQ-da ótken baspasóz máslıhaty barysynda Danıal Ahmetov.
Sonymen birge, ShQO ákimi «Óskemen - Jalańashkól», «Semeı - Jalańashkól» arasynda temir jol salynatynyn atap ótti. Onyń aıtýynsha, Alakólge qytaılyq týrısterdiń kelýine de jaıly jaǵdaılar jasalyp jatyr.
«Alakólmen qatar, Sibe aýmaǵyndaǵy demalys oryndaryna 1 mlrd teńge bólindi. Buqtyrma sý qoımasynda da jumystar qarqyndy júrýde. Kelesi jyly biz avtokólik joldarynyń barlyǵyn jóndeýdi aıaqtaımyz. Osylaısha, óńirimizdiń 300 myń turǵyny demalystaryn kóńildi ótkize alady», - deıdi Ahmetov.
