Alakól jaǵasynda átkenshek úzilip, balalar zardap shekti
ÓSKEMEN. QazAqparat - Búgin Shyǵys Qazaqstan oblysynda Alakóldiń jaǵasynda úsh bala zardap shekti. Baldyrǵandar átkenshekte terbelip jatqan kezde onyń shynjyry úzilip ketken. Olar jedel járdemmen Maqanshy aýylynyń aýrýhanasyna jetkizildi, dep habarlaıdy QazAqparat Altaynews.kz saıtyna silteme jasap.
Oqıǵa ornynda túsirilgen vıdeony Almıra Dúısekenova esimdi demalýshy Facebook paraqshasynda júktedi.
Onyń aıtýynsha, kól jaǵasyndaǵy balalarǵa arnalǵan átkenshektiń shynjyry úzilip, 7 jastaǵy búldirshinder jaralanǵan.
«Sý jaǵasyndaǵy dúnıelerdiń sý jańa bolǵanyn qaıteıin, barlyǵy Qytaıdyń arzan materıaldarynan jasalǵan. Oıyn alańqaıyn ornatqan adamdardyń kásibı biliktilikterine de kúmánim bar. Memlekettik tapsyrysty kim oryndaǵan? Balalardy jádel járdem alyp ketti, dıagnozdary áli belgisiz. Bul jerde 15 myńnan artyq adam demalyp jatsa da birde-bir kezekshi jedel járdem kóligi joq. 15 mınýttan keıin kelgen dárigerlerdiń kóliginde zembilderi de bolmaı shyqty. Jaralanǵan balany ákesi kóterip aparyp kólikke saldy. Alakólde demalǵanda saq bolyńyzdar», - deıdi ol.
Al Maqanshy aýylyndaǵy aýdanaralyq aýrýhananyń bas dárigeri Naǵıma Jaqııanovanyń aıtýynsha, zardap shekken eki bala. Olar tolyq tekserilip shyqty.
«Jańa ǵana jetkizildi. Rentgenge túsirdik, súıekteri din aman. Balalardyń stresstik soqqy alǵany baıqalady. Jerge qulaǵan kezde paıda bolǵan sál dene jaraqattary bar», - deıdi bas dáriger.
Onyń sózinshe, jádel járdem 15 mınýtta jetken. Al jaǵalaýda 3 medıtsınalyq pýnkt jumys isteıdi.
«Medpýnktter bolmasa jedel járdem kóligi 100 shaqyrym jerden 15 mınýtta jete almas edi. Aldymen qońyraý bizge tústi. Biz jaǵalaýdaǵy daıyn turǵan medqyzmetkerlerdi jiberdik. Balalarǵa shınanyń da, zembildiń de qajettiligi bolmaǵan», - dedi ol.
Kól jaǵalaýyndaǵy qurylysty júrgizgen merdiger «ShQO Úrjar aýdany» mekemesi ekendigi anyqtaldy. Kompanııa basshysynyń málimetinshe, aspaly átkenshekterdiń qurylysy áli tolyq aıaqtalmaǵan.
«Qaýipsizdik úshin átkenshekterdiń astyna rezeńke tósenishter qoıylý kerek bolatyn. Ol jerde átkenshek tebýge bolmaıdy, aspaly sheńberler tek qana otyrýǵa arnalǵan», - deıdi «ShQO Úrjar aýdany» mekemesiniń basshysy Ardaq Zarıpov.
Illıýstratsııalyq foto
