Alakól jaǵasynyń lastyǵy men qaýipsizdiktiń sylbyrlyǵy máselesi qalaı sheshilmek
SEMEI. KAZINFORM – Prezıdent Qasym-Jomart Toqaevtyń Alakól mańyndaǵy áıgili týrıstik aımaqtyń demalýshylardy qarsy alýǵa daıyndyǵy tómendigi jaıly aıtqan synynan keıin Abaı oblysy ákiminiń orynbasary Serik Túlenbergenov Maqanshy aýdanyna bardy.
Demalys úılerine aıyppul salynady
Búgin kól basynda shuǵyl jıyn ótkizildi. Onda demalýshylarǵa qolaıly jaǵdaı jasaý, sanıtarlyq tazalyq pen qaýipsizdik máseleleri talqylandy.
Endi kól jaǵasyna quqyq qorǵaý organdarymen birge reıd júrgizilip, tártiptik sharalar kúsheıtilmek. Sonyń ishinde motorly qaıyq ıeleriniń qyzmet kórsetýleri qatań tekseriledi. Tazalyq máselesi qarastyrylyp, qoqys tastaǵan saýda oryndary men demalys úılerine aıyppul salynady.
- Alakóldiń Abaı oblysyndaǵy jaǵalaýyna bıyl erekshe kóńil bólinip jatyr. Buǵan deıin naýryz aıynan bastap oblys ákimi Berik Ýálı týrıstik orynǵa 3 ret baryp, kóshpeli jıyndar ótkizgen. Alakól jaǵalaýyna 2018 jyldan beri jóndeý jumystary júrgizilmegen. Osyny eskere otyryp, oblystyq bıýdjetten 658 mln teńge qarjy bólindi. Bul qarjydan Arbat alańyn jóndeýge 108,9 mln tg, jańa qoǵamdyq keńistik qurýǵa 171,6 mln tg, jaǵalaýdy abattandyrýǵa 107,5 mln tg baǵyttaldy. 25 kıim aýystyratyn oryn, 50 konteıner, 2 bıotýalet ornatyldy. 7 pırstiń 3-eýi ornatylyp, qutqarý munaralary men jaǵajaıdy jaryqtandyrý jumystary júrgizildi, - dep habarlady Abaı oblysy ákiminiń baspasóz qyzmeti.
Sonymen qatar jaǵalaýda qutqarý stantsııasynyń qurylysy bastaldy. Atalǵan stantsııa Alakól aýmaǵynda tótenshe jaǵdaılardyń aldyn alý, saldaryn joıý, alǵashqy medıtsınalyq kómek kórsetýge múmkindik jasaý, adam ómirin saqtaý men jalpy qaýipsizdik deńgeıin arttyrýǵa baǵyttalǵan.
Sondaı-aq Qabanbaı aýylynda órt sóndirý deposy salynyp jatyr. Eki órt sóndirý avtokóligine arnalǵan beket Alakól mańy men aýmaǵyndaǵy órt qaýipsizdigin qamtamasyz etýge arnalǵan. Tazalyq saqtaý jáne turmystyq qaldyqtardy shyǵarý máselesine qatysty qosymsha 100 qoqys konteıneri men 75 ýrna ornatylǵan. Búginde jalpy 110 konteıner bar. Arbat aýmaǵynda tazalyq jumystary ár 30 mınýt saıyn, al jaǵalaýda kúnine úsh ret júrgiziledi. Qaldyqtardy óńdeýge arnalǵan polıgon qurylysyna jobalyq-smetalyq qujattama ázirlenip jatyr, - delingen aqparatta.
Elektr energııasy tapshylyǵy sheshile me?
Bıyl jaǵalaýdaǵy sanıtarlyq toraptar sany 8-den 18-ge deıin kóbeıtiledi. Qazirdiń ózinde 10-y ornatyldy.
- Elektr energııasy tapshylyǵyn sheshý úshin jańa «Alakól» qosalqy stansasy men joǵary kerneýli jeliler qurylysyna jobalar daıyndaldy. Qurylys jumystary 2026 jyldyń qazan aıynda aıaqtalady. Qaýipsizdikti kúsheıtý maqsatynda qutqarýshylar men ınstrýktorlar kúndelikti kezekshilik júrgizip jatyr. 5 qutqarý munarasy, 6 adamnan turatyn arnaıy top jumys istep tur. Tótenshe jaǵdaılar mınıstrligi jáne kólik ınspektsııasy jaǵajaı aımaǵynda sý kólikterine turaqty reıdter júrgizýde. Qazirdiń ózinde 30 sý kóligi tekserilip, 12 ákimshilik hattama toltyrylǵan. Abaı oblysynyń ákimdigi Prezıdent tapsyrmasyna sáıkes barlyq sharalardy jedel qolǵa alyp, Alakól jaǵalaýyndaǵy ahýaldy jaqsartý boıynsha keshendi jumystardy jalǵastyra beredi, - delingen málimette.
Eske salsaq, osyǵan deıin Memleket basshysynyń halyqtan kelip túsken kóptegen shaǵymǵa baılanysty Alakól mańyndaǵy áıgili týrıstik aımaqtyń demalýshylardy qarsy alýǵa daıyndyǵy tómen ekenine Úkimettiń nazaryn aýdarǵany habarlanǵan.