Alakól jaǵalaýyndaǵy kemshilikter anyqtalyp, naqty tapsyrmalar berildi
ASTANA. KAZINFORM — Memleket basshysynyń tapsyrmasyn oryndaý aıasynda Týrızm jáne sport mınıstri Erbol Myrzabosynov Premer-mınıstrdiń orynbasary Ermek Kósherbaev bastaǵan Úkimet delegatsııasy quramynda Abaı jáne Jetisý oblystaryndaǵy Alakól kóliniń kýrortty óńirine bardy.
Jumys saparynyń maqsaty — ınfraqurylymnyń qazirgi jaı-kúıi men demalys jaǵdaıyn baǵalaý, sondaı-aq týrıstik salany damytý jónindegi tapsyrmalardyń oryndalýyn qadaǵalaý. Kóldiń eki jaǵalaýyna da tekseris jumystary júrgizilip, jergilikti atqarýshy organdar jáne bıznes ókilderimen kezdesý ótti.
Tekserý barysynda birqatar júıeli másele anyqtaldy. Atap aıtqanda, keıbir jaǵajaılarda sanıtarııalyq-gıgıenalyq toraptar, dýsh kabınalary, qoqys jáshikteri, arnaıy belgiler men qorshaýlar joq; sý kólikterine baqylaý jetkiliksiz; qutqarý munaralary men aqparattyq quraldar tapshy. Qaýipsizdikke qoıylatyn negizgi talaptar saqtalmaı otyr.
— Týrıstik qyzmetterdiń sapasyn arttyrý — salany damytýdyń basty mindetteriniń biri. Týrıster aǵynynyń artýyna qaramastan, birqatar kýrortty óńirde qyzmet kórsetý deńgeıi zaman talaptaryna saı kelmeıdi. Mınıstrlik «Týrıstik qyzmet týraly» zańǵa mindetti standarttar engizý, ókilettikterdi keńeıtý jáne ınfraqurylymdy damytýǵa baǵyttalǵan túzetýler ázirleýde. Bul qaýipsizdik, jaılylyq pen joǵary deńgeıdegi qyzmetti júıeli túrde qamtamasyz etýge múmkindik beredi. Basty maqsatymyz — otandyq týrısterdiń demalysyn sapaly ári qaýipsiz etý, — dedi Erbol Myrzabosynov.
Tekserý nátıjesi boıynsha birqatar naqty tapsyrma berildi:
Jaǵajaı aýmaǵyndaǵy sanıtarııalyq jabdyqtaýdy kúsheıtý;
Qosymsha qoqys konteınerlerin satyp alý;
Qaýipsiz shomylý aımaqtaryn naqty belgilep, arnaıy belgiler jelisin uzartý;
Kıim aýystyratyn oryndar, dýsh kabınalary jáne basqa da abattandyrý elementterin ornatý múmkindigin qarastyrý;
Belsendi demalys aımaqtaryn uıymdastyryp, kóleńke tentter ornatý;
Qutqarý munaralary men sýǵa qaýipsiz kirýge arnalǵan baspaldaqtar sanyn kóbeıtý;
Jaǵajaı aýmaǵyna aqparattyq stendter men syzbaly kartalar ornatý.
Anyqtalǵan kemshilikterdi joıý boıynsha jergilikti atqarýshy organdarǵa naqty merzim belgilendi. Mınıstrlik bul tapsyrmalardyń oryndalýyn qaıta tekserýdi josparlap otyr. Týrıstik demalystyń sapasy men qaýipsizdigi — Úkimet pen Mınıstrliktiń udaıy baqylaýynda.
Aıta ketelik Ermek Kósherbaev Alakól kóliniń jaǵalaýyndaǵy demalys aımaqtaryn teksergen edi.