Alakól jaǵalaýyndaǵy ınfraqurylymdy damytýǵa bıyl 2,4 mlrd teńge qarastyrylǵan

ASTANA. KAZINFORM — Qarjy Abaı oblysynyń bıýdjetinen bólingen. Bul jóninde QR Týrızm jáne sport mınıstrligi resmı saýalymyzǵa joldaǵan jaýabynda málimdedi.

Týrıstik orynda qutqarý stantsııasy salyndy. Sondaı-aq órt deposynyń qurylysy júrip jatyr.

— Týrıstik maýsym bastalǵanǵa deıin sanıtarlyq toraptardy ornatý, jaǵalaýdy jaryqtandyrý, pırs salý, saıabaqty jóndeý jáne abattandyrý jumystary júzege asyrylady, — delingen habarlamada.

Sonymen qatar ınfraqurylymdy damytý maqsatynda 2028 jylǵa deıin naqty jospar bar.

— Jobaǵa saı, elektr jelileri tartylyp, blokty-modýldi tazartý qurylystary salynady. Magıstraldy káriz jelileri júrgiziledi, sondaı-aq jol ınfraqurylymy jańartylady. Odan bólek pırs, jaryqtandyrý júıeleri, qorshaýlar, saıabaq pen jaıaý júrginshilerge arnalǵan demalys aımaqtaryn salý kezeń-kezeńimen iske asyrylady, — delingen resmı jaýapta.

Jaǵalaýdy elektr qýatymen qamtý da nazardan tys qalmaǵan.

— Elektr qýatymen qamtamasyz etý máselesin sheshý maqsatynda 110 kV jáne 35 kV elektr jelilerin salý jobasy iske asyrylyp jatyr. Jobanyń jalpy quny — 7,9 mlrd teńge. Onyń 30%-y oblystyq bıýdjet esebinen qarjylandyrylady. Sonymen qatar, uzyndyǵy 20 shaqyrym elektr jelilerin rekonstrýktsııalaý josparlanǵan. Jobanyń boljamdy quny — 700 mln teńge, — delingen habarlamada.

Odan bólek sanıtarlyq ınfraqurylym da jaqsartylady.

— 2026 jyly sanıtarlyq toraptardy ornatýǵa 299,5 mln teńge bólindi. Bul qarajatqa modýldi dárethanalar ornatylyp, septık júıeleri qarastyrylady. Sondaı-aq bloktyq-modýldik tazartý qurylystary men magıstraldyq káriz jelileri salynady. Olardyń árqaısysynyń aldyn ala quny — shamamen 1 mlrd teńge. Týrıstik maýsymda jaǵalaý aýmaǵynan qoqys shyǵarý jumystaryna 73,7 mln teńge qosymsha qarjy qarastyrylǵan, — delingen resmı jaýapta.

Aıta keteıik, buǵan deıin bıyl jazda Alakólge qosymsha 9 poıyz qatynaıtynyn jazǵanbyz.