Alakól jaǵalaýynda sheteldikterge arnalǵan kazıno ashylmaq
SEMEI. KAZINFORM — Abaı oblysyndaǵy Alakól jaǵalaýynan kazıno men oıyn avtomattary zaldaryn ornalastyrýǵa arnalǵan aýmaqtyń shekarasyn belgileý josparlanyp otyr. Oǵan tek shetel azamattary, azamattyǵy joq adamdar jáne oıyn bıznesi mekemeleriniń qyzmetkerleri ǵana kire alady.
Tıisti qaýly jobasy «Ashyq NQA» portalynda qoǵamdyq talqylaýǵa shyǵaryldy.
Qujatta atalǵan bastamanyń Qazaqstan zańnamasyna sáıkes oıyn bıznesi nysandaryn ornalastyrýdyń quqyqtyq negizderin naqtylaýǵa baǵyttalǵany aıtylǵan.
— Jobany qabyldaý Abaı oblysyndaǵy Alakól jaǵalaýynda tek shetel azamattary, azamattyǵy joq adamdar, oıyn bıznesi mekemeleriniń qyzmetkerleri jáne qyzmettik mindetterin oryndaýyna baılanysty oıyn mekemesinde júrgen ózge de tulǵalar kire alatyn kazıno men oıyn avtomattary zaldaryn ornalastyrýdyń quqyqtyq negizderin naqtylaýǵa múmkindik beredi, — delingen qujat jobasynda.
Jobany iske asyrý týrıstik ınfraqurylymdy damytýǵa, jańa jumys oryndaryn ashýǵa jáne jergilikti bıýdjetke túsetin túsimderdi arttyrýǵa yqpal etýi múmkin dep kútilip otyr. Sonymen qatar mundaı nysandardy ornalastyrý kezinde ekologııa jáne qoǵamdyq tártip salalaryn qosa alǵanda, zańnama talaptary saqtalýy tıis.
Qujatty Abaı oblysynyń sáýlet, qala qurylysy jáne jer qatynastary basqarmasy ázirlegen. Qaýly jobasy 2026 jylǵy 19 qazanda daıyndalǵan. Qoǵamdyq talqylaý 4 qarashaǵa deıin jalǵasady.
Eske salsaq, osyǵan deıin Alakólde joǵalǵan telefon men qolsómke JI kameralary arqyly tabylǵany habarlanǵan.
