Alakól jaǵalaýynda qyzyl qońyz qaptap ketti

SEMEI. KAZINFORM – Abaı oblysynda Maqanshy aýdanyndaǵy Alakól jaǵalaýynda qyzyl qońyz qaptap ketti.

Sońǵy kúnderi áleýmettik jelide Alakóldiń Abaı oblysyndaǵy jaǵalaýynda qyzyl qońyzdardyń qaptaǵany jaıly vıdeo tarady. 

Osyǵan oraı Maqanshy aýdanynyń ákimdigine habarlasyp kórgen edik. Ákimdik ókilderi qyzyl qońyzdar qonǵan jerlerdi zalalsyzdandyrý jumystary júrgizilip jatqandyǵyn málim etti.

Aýdan ákimi Dáýren Koıgeldın bastaǵan jumys toby sol jumystardy baqylaýǵa alǵan.

«Maqanshy aýdanynyń turǵyndary Alakól aımaǵynda jándik qaptaǵany týraly vıdeolar jiberdi. Sol jaqqa fıtosanıtarııa, SES, vetınspektsııa mamandary bardy. Arnaıy jumys toby da qurylǵan», - deıdi aýdan ákimi.

Onyń aıtýynsha, «Dızenfektsııa medıtsınalyq mekemesi» mamandary ázirge 5 gektarǵa jýyq aýmaqty «karate», «sıpermetrın», «agran» sııaqty preparattarmen dızenfektsııalady. Nátıjesinde 20-25 mınýt ishinde qońyzdardyń kózi joıyldy. Atalǵan baǵyttaǵy jumystar apta sońyna deıin jalǵasyp, jalpy kólemi 35 gektar aýmaq dızenfektsııalanatyn bolady.

Sonymen qatar SES jáne veterınarııalyq ınspektsııa mamandary atalǵan qońyz qaptaýy saldarynan mal qyrylyp jatyr degen aqparatty joqqa shyǵardy. Aýyldaǵy maldan bıomaterıaldar jáne sýdan synama alynyp, zerthanaǵa jiberilmek.