Alakól jaǵalaýynda 2018 jyldan beri jóndeý jumystary júrgizilmegen
SEMEI. KAZINFORM – Abaı oblysyndaǵy Alakól jaǵalaýynda jańa qoǵamdyq keńistik salynbaq.
Turǵyndar tarapynan Alakól jaǵalaýyndaǵy Arbattyń jaǵdaıyna baılanysty syn kóp aıtylyp keledi. Oblys ákimdiginiń málimetinshe, qazir Arbat jańartylyp, boıaý, syrlaý jumystary júrgizilip jatyr. Budan bólek jaǵalaýdaǵy eskirgen temir jaqtaýlar da tolyq aýystyryla bastady.
- Bıyl jaǵalaýdaǵy 5 shaqyrymǵa jýyq jolǵa asfalt tóseledi. 10 modýldi, 15 bıodárethana, 40-tan astam kıim aýystyratyn kabınalar qoıylady. Qoqys jáshikteri men beınebaqylaý kameralarynyń sany artady. Jaǵalaýdy nyǵaıtý úshin pırs jáne qalqyma ornatylady, - deıdi Maqanshy aýdanynyń ákimi Dáýren Qoıgeldın.
Týrıster kóp keletin Arbattyń júktemesin azaıtý úshin jańa qoǵamdyq keńistik salynady. Munda 100 adamǵa arnalǵan saýda-sattyq oryndary qarastyrylmaq. Atap aıtqanda, úlken sahna, sýburqaq salynyp, turǵyndar serýendeıtin arnaıy alań bolady.
Qazirgi ýaqytta jerdi tegisteý, keramıkalyq taqtaıshalardy tóseý jáne qorshaý ornatý jumystary bastalǵan. Qoǵamdyq keńistik qurylysy 1 shildege deıin aıaqtalady.
- Osydan eki aı buryn Alakólge arnaıy kelip, qajettilikterdi bilip, barlyq máselemen tanysqan bolatynmyn. Halyq kóp keletin týrıstik aımaqta 2018 jyldan beri jóndeý jumystary júrgizilmegen eken. Osyny eskere otyryp, oblystyq bıýdjetten 658 mln teńge qarjy bóldik. Sýǵa túsý maýsymy ashylǵanǵa deıin jumysty sapaly aıaqtaýymyz kerek, - dedi oblys ákimi Berik Ýálı.
Jazǵy demalys maýsymynda Alakól jaǵalaýynda qaýipsizdikti qamtamasyz etý úshin 40 polıtsııa qyzmetkeri jumyldyrylady. Órt qaýipsizdigin saqtaý maqsatynda Tótenshe jaǵdaılar departamentiniń qyzmetkerleri kezekshilikke tartylyp, órt sóndirý kólikteri jumys isteıdi.
Eske salsaq, osyǵan deıin ShQO-daǵy jaǵajaılar shomylý maýsymyna áli tolyq daıyn emestigi habarlanǵan.