Jetisýdaǵy Alakól jaǵalaýynda 109 keme ıesi ákimshilik jaýapqa tartyldy
TALDYQORǴAN. KAZINFORM — Jetisýdaǵy Alakól jaǵalaýynda jazǵy maýsym bastalǵany beri shaǵyn kólemdi kemelerdi paıdalaný erejesi talaptaryn buzǵan azamattarǵa qatysty 109 ákimshilik jaza qoldanyldy.
Bul qabyldanǵan sharalar demalýshylardyń qaýipsizdigin qamtamasyz etýge baǵyttalǵan.
— Bıylǵy jyldyń 15 mamyrynan beri TJD qyzmetkerleri basqa da jaýapty organdarmen birlesip 90 kúndizgi jáne 62 túngi reıd uıymdastyryldy. Sý kólikterin tekserý ókilettigi berilgen sátten bastap shaǵyn kemelerdi paıdalaný talaptaryn buzý faktisi qatysty 109 hattama toltyrylyp, 1 mln 654 myń teńgeden astam aıyppul salyndy. Atap aıtqanda, kemeniń bort nómirleriniń bolmaýy, belgilengen shamadan tys artyq jolaýshy alyp júrý, óziniń qujaty joq nemese keme bıleti joq bolǵan jaǵdaılar, navıgatsııalyq belgiler talaptaryn saqtamaý, qutqarý jıletiniń bolmaýy sııaqty zańbuzýshylyqtarǵa shara qoldanyldy. Shaǵyn kólemdi kemelerdi paıdalaný qaǵıdalary men qaýipsizdik talaptaryn buzǵan tulǵalarǵa zańnamaǵa sáıkes qatań ákimshilik yqpal etý sharalary qoldanylady, — dedi Jetisý oblysynyń Tótenshe jaǵdaılar departamentiniń bastyǵy Qanat Altynbekov.
Sonymen qatar polıtsııa qyzmetkerleri tarapynan jaǵalaýda júrgizilgen quqyqtyq tártiptiń saqtalýyn qamtamasyz etý maqsatyndaǵy reıdtik sharalary barysynda 1755 ákimshilik quqyq buzýshylyq anyqtalyp, ákimshilik hattamalar toltyryldy, 3,5 myń teńgege jýyq ákimshilik aıyppul salyndy. Sonyń ishinde usaq buzaqylyq, tynyshtyqty buzý, alkogoldik ishimdikterdi ishý nemese qoǵamdyq oryndarǵa masań kúıde kelý, abattandyrý qaǵıdalaryn buzý, jolda júrý erejelerin buzý faktileri bar.
Bul rette Alakól kólinde demalýshylardyń qaýipsizdigin qamtamasyz etý maqsatynda jaǵalaý aýmaǵynda táýlik boıy kezekshilik uıymdastyrylǵan. Bul jumystarǵa 14 qutqarýshy, 11 motorly qaıyq jumyldyrylǵan. Oǵan qosa qosymsha oblystyq TJD mamandary aldyn alý sharalaryna turaqty túrde tartylýda. Sonymen qatar bıylǵy shomylý maýsymynda qoǵamdyq tártipti qamtamasyz etý úshin 50 polıtsııa qyzmetkeri, 16 qyzmettik avtokólik jáne 5 ushqyshsyz dron tartylǵan. Sondaı-aq, sý kólikterine arnalǵan aıyp turaǵy bar.
Sonymen qatar jaǵalaý boıynda 40 qutqarý munarasy ornatylyp, 13 shaqyrymǵa býı syzyqtary tartylǵan. Qaýipsizdikti qamtamasyz etý maqsatynda jergilikti polııanyń Jedel basqarý júıesine qosylǵan 39 beınebaqylaý kamerasy jumys isteıdi.
Eske salsaq, ótken jyly Alakóldegi shaǵyn júzý quraldarynyń qozǵalysyn retteý maqsatynda Jetisý oblysynda ortaq sý paıdalaný jáne sý aıdyndaryndaǵy qaýipsizdik qaǵıdalary bekitildi. Atalǵan qaǵıdalarda sý aıdyndaryndaǵy qaýipsizdik talaptary jan-jaqty túsindirildi, olardy saqtamaǵany úshin jaýapkershilik belgilendi.
Júrgizilip jatqan profılaktıkalyq jáne baqylaý-qadaǵalaý jumystary azamattardyń sý aıdyndaryndaǵy qaýipsizdik deńgeıin arttyrýǵa, quqyq buzýshylyqtardyń aldyn alýǵa, sondaı-aq shomylý maýsymy kezeńinde tótenshe jaǵdaılardyń týyndaý qaýpin tómendetýge baǵyttalǵan.
