Alakól jaǵalaýyna jańa jeliden elektr qýaty berile bastady
TALDYQORǴAN. KAZINFORM — Alakól jaǵalaýyndaǵy demalys oryndaryna jańa «Aqshı» qosalqy stantsııasynan elektr jaryǵy berile bastady. Bul týraly Jetisý oblysy ákiminiń baspasóz qyzmeti málim etti.
Jaǵalaýdy elektrmen úzdiksiz jabdyqtaý úshin Beskólden Aqshıge deıin joǵary voltty elektr berý jelileri salynyp, jańa «Aqshı» qosalqy stantsııasynyń qurylysy júrgizilgen bolatyn.
— Demalys oryndary zaman talabyna saı qajetti qural-jabdyqtardy turaqty paıdalanǵandyqtan, eski jeli elektr qýatynyń aýqymdy júktemesin kótere almaı jıi sónetin jáne elektr qýatyna degen tapshylyq baıqalǵan. Osy máseleni sheshý úshin Beskólden Aqshıge deıin 56 shaqyrym 110 KVt elektr jelisi tartylyp, qosalqy stantsııa salyndy. Joba jospar boıynsha kelesi jyly aıaqtalýy kerek bolatyn, biraq merdiger kompanııa jumysty qarqyndy júrgizip, bıylǵy demalys kezeńine deıin 4-6 maýsymnan bastap demalys aımaqtaryna jańa jeliden elektr qýatyn berdi. Qosalqy stantsııa 32 MVt elekt qýatyn shyǵarady, al qazirgi qajettilik 10 MVt qurap otyr, ıaǵnı jańa jeliniń qýaty bolashaqqa eseptelgen, — deıdi Alakól aýdandyq turǵyn úı-kommýnaldyq sharýashylyǵy, jolaýshylar kóligi, avtomobıl joldary jáne turǵyn úı ınspektsııasy bóliminiń basshysy Aıdar Ábishev.
Elektr tapshylyǵy máselesiniń sheshilgenine demalys oryndarynyń ıeleri de rıza.
— Buryn jaryq jıi óship, bizdiń jumysymyzǵa, demalýshylarǵa da kóp qolaısyzdyq týǵyzatyn. Kondıtsıoner, boıler, tońazytqysh sekildi qurylǵylarymyzdy qatar qossaq, qysym kóbeıip kete me dep alańdaıtynbyz. Bıylǵy jańa maýsymnan bastap osy qıyndyqtan qutyldyq. Bul — jaǵalaýdy damytýǵa jasalǵan jemisti qadam boldy dep oılaımyn, — deıdi kásipker Ashat Slıamov.
Osy jańa jeli arqyly bolashaqta káriz tazartý qurylǵysyna da elektr qýaty beriledi. Aqshı aýylynda káriz júıesiniń qurylysy jobasy 2023 jyly iske asyrylyp, 69,7 shaqyrym káriz jelisi salynǵan bolatyn, endigi kezekte Aqshı aýlynda káriz tazartý qurylǵysyn salý jumystary júrgizilýde. Merdigerlik uıym nysannyń qurylys jumystaryn osy jyldyń 27 sáýirinen bastaǵan. Búgingi kúni zerthana ǵımaratynyń irgetasyna shuńqyr qazý, KOS ǵımaratyna shuńqyr qazý, sondaı-aq tundyrǵyshtar úshin topyraq shyǵarý jumystary sııaqty jer qazý jumystary júrgizilýde. Qurylysty 2026 jyly aıaqtaý josparlanǵan. Aıdar Ábishevtiń aıtýynsha, káriz sýy bıologııalyq óńdeýden ótkizilip, budan ári tehnıkalyq sý retinde kógaldandyrý maqsatyna paıdalanylatyn bolady.
Osy rette atap ótsek, demalys oryndarynda baılanys pen ınternettiń sapasyn arttyrý maqsatynda jaǵalaýda 16 bazalyq stantsııa jumys isteıdi, 2024 jyly optıkalyq-talshyqty jeli tartyldy. Internet baılanysyna týrıstik nysandar kezeń-kezeńimen qosylyp jatyr.
Aıta keteıik, buǵan deıin Úsharal áýejaıy men Aqshı aýylynyń arasyna arnaıy avtobýs qatynaıtynyn jazǵan edik.