Alakól jaǵalaýyn nyǵaıtýǵa 25 mlrd teńge bólindi: depýtattar jobalardyń tıimdiligin tekserýdi talap etti
ASTANA. KAZINFORM – Alakól jaǵalaýyn nyǵaıtýǵa 25 mlrd teńgeden astam qarajat qarastyrylǵan. Alaıda kásipkerler men sala mamandary josparlanǵan jumystardyń qanshalyqty tıimdi ári uzaq merzimge jaramdy bolatynyna alańdaıdy.
Olardyń pikirinshe, jobalar kóldiń tabıǵı erekshelikterin eskermese, jaǵalaýdy birneshe jyldan keıin qaıta jóndeýge bıýdjetten taǵy da qarjy bólýge týra kelýi múmkin.
Bul másele búgin Quryltaıdaǵy Respublica partııasy fraktsııasynyń bastamasymen uıymdastyrylǵan dóńgelek ústelde talqylandy.
Jıyndy ashqan Respublica partııasynyń tóraǵasy, Quryltaıdaǵy fraktsııa jetekshisi Aıdarbek Qojanazarov jaǵalaýdy nyǵaıtýǵa bólingen qarjynyń nátıjesi tek salynǵan nysandarmen ólshenbeýi keregin aıtty.
Onyń sózinshe, basty maqsat – Alakóldiń tabıǵı baılyǵyn saqtap, týrıster úshin qaýipsiz ári qolaıly demalys ornyn qalyptastyrý.
– Bizdiń maqsatymyz – Alakóldiń tabıǵı baılyǵyn saqtaı otyryp, ony qaýipsiz, qoljetimdi ári zamanaýı týrıstik aımaq retinde damytý. Bıýdjetten bólingen mıllıardtaǵan qarajattyń nátıjesi tek salynǵan nysandarmen ólshenbeýi kerek. Eń bastysy – jaǵajaılar saqtalyp, ınfraqurylym qorǵalyp, kýrorttyq aımaqtyń turaqty damýyna jaǵdaı jasalýy tıis, – dedi ol.
Quryltaı depýtaty Ekaterına Smolıakova Alakóldiń shyǵys jaǵalaýyndaǵy jobalyq sheshimderge qatysty kásipkerlerdiń alańdaýshylyǵyn jetkizdi.
Olardyń aıtýynsha, usynylǵan ınjenerlik tásilder kólge tán qatty jeldi, tolqynnyń áserin, muz júktemesin jáne topyraq quramyn tolyq eskermeýi múmkin. Budan bólek, tabıǵı jaǵajaılardyń joıylý qaýpi de bar.
Depýtattyń pikirinshe, jaǵalaýdy nyǵaıtý jumystary máseleni birneshe jylǵa ǵana sheshetin ýaqytsha shara bolmaýy kerek.
– Osy bólingen qarajat tıimdi ári durys jobaǵa jumsalýy kerek. Árıne, jaǵalaýdy nyǵaıtamyz. Biraq iske asyrylatyn joba tıimdi ári uzaq merzimge jaramdy bolýy tıis. Kelesi jyly biz taǵy aqsha izdemeýimiz kerek, – dedi Ekaterına Smolıakova.
Dóńgelek ústelde jaǵalaýdy nyǵaıtý tehnologııalarynyń negizdiligi, jobalardyń quny, qurylys sapasyna beriletin kepildik jáne merdigerlerdiń jaýapkershiligi de sóz boldy. Qatysýshylar jobalardy iske asyrý kezinde kóldiń tabıǵı erekshelikteri men jaǵajaılardyń saqtalýyna basa mán berý qajettigin atap ótti.
Buǵan deıin Qazaqstanda ishki týrızm 84,4%-ǵa óskenin jazǵan edik.