Alakól jaǵalaýyn kútip ustaıtyn kommýnaldyq mekeme quryldy – ákim esebi

ASTANA. KAZINFORM – Jetisý oblysynda jańadan Týrızm basqarmasy quryldy. Alakól jáne Balqash kólderiniń jaǵalaýyn kútip ustaý úshin eki kommýnaldyq mekeme quryldy. Oblystyń týrıstik ınfraqurylymy týraly ákim Beıbit Isabaev eseptik kezdesýinde baıandady. 

Ákimniń aıtýynsha, oblys qurylǵan sátten beri bul salaǵa memlekettik bıýdjetten 53 mlrd teńge bólingen, 64 jańa nysan paıdalanýǵa berilgen.

– Jyl saıyn óńirge 2 mıllıonnan astam týrıst keledi. Olardyń kelip-ketýine jáne demalýyna qolaıly jaǵdaı jasaý – basty mindettiń biri. Bıyl jańa «Aqshı-Beskól» elektr jelisi jáne qosalqy stantsııasy iske qosyldy. Jaǵalaýdy nyǵaıtý bógetteri men káriz tazartý qurylǵysy salynyp jatyr. Balqash kóliniń jaǵalaýyna deıin jol, sýmen jabdyqtaý, sý burý, elektr jelileri jetkizildi. Kól jaǵalaýynda 6 kommýnaldyq jaǵajaı qarastyrylǵan, onyń 3-eýi salynyp jatyr. Endi jaǵalaýdy abattandyryp, jeke ınvestorlardy tartyp, demalys aımaqtaryn salý mindeti tur, - dedi B. Isabaev Ortalyq kommýnıkatsııalar qyzmetinde ótken baspasóz máslıhatynda. 

Úsharal qalasy áýejaıynyń ushý-qoný jolaǵyn rekonstrýktsııalaý jumystary aıaqtaldy. Bul jolaq jolaýshylar jáne júk ushaqtaryn qabyldaýǵa múmkindik beredi. Qazir jańa aerovokzal kesheniniń jobalyq-smetalyq qujattamasy ázirlenip jatyr. 

Sondaı-aq Lepsi stantsııasynda jańa temirjol vokzaly salynýda. Ǵımarat keler jyly qoldanysqa beriledi.

Al ekologııalyq týrızmdi damytý úshin «Altynemel» jáne «Jońǵar Alataýy» ulttyq park aýmaqtarynda vızıt-ortalyqtar ashyldy. Jasylkól kóline jáne Sh. Ýálıhanov memorıaldyq mýzeıine aparatyn joldar jóndeldi. «Burqanbulaq» sarqyramasy jolynyń qurylysy bastaldy. 

Aıta keteıik, Jetisý oblysynda bıylǵy 10 aıda barlyq sala boıynsha ósim baıqalady. Óńirde 27 jańa óndiris ashylyp, myń jarym jumys orny quryldy.

«Qorǵas» arnaıy ekonomıkalyq aımaǵynda 32 joba iske asyrylyp, 2 myńnan astam jumys orny ashylǵan.