Alakól jaǵalaýyn bekitýge 20 mlrd bólindi: joba qashan bastalady
TALDYQORǴAN. KAZINFORM — Jetisý oblysynda Alakól kóliniń jaǵalaýyn bekitý jáne serýen aımaǵyn abattandyrý jobasy bastalǵaly jatyr.
Alakól aýdanynyń ákimi Almas Ábdınov agenttik tilshisine bergen jaýabynda negizgi jumystar qashan bastalatynyn aıtty.
— Baıqaý rásimderi aıaqtalyp, merdiger uıym tańdaldy. 1 shildeden bastap olar Kóktuma mańyna keldi. Jumystar aldymen Kóktuma aýyly jaqtan bastalady, sebebi Aqshı aýylynda qazir shomylý maýsymynyń qyzǵan shaǵy. Aqshıde qurylys jumystary 10 tamyzdan bastalady dep josparlanǵan. Bul jobanyń alǵashqy kezeńi. Ekinshi kezeńi — jaǵalaý aýmaǵyn abattandyrý, — dedi ákim.
Onyń aıtýynsha, jobanyń alǵashqy kezeńin júzege asyrý úshin respýblıkalyq bıýdjetten 19 mıllıard teńge bólinedi. Qazirdiń ózinde 1,5 mıllıard teńge qarajat berilgen. Jumystardy eki jyl ishinde aıaqtaý kózdelip otyr. Dambanyń jalpy uzyndyǵy 13 shaqyrymnan asady. Aqshı jáne Kóktuma aýyldarynyń boıyndaǵy kól jaǵalaýy bekitiledi. Bul dambanyń negizgi maqsaty — jaǵany joıqyn tolqyndar men kóktemgi muzdardyń soqqysynan qorǵaý.
Eske salaıyq, buǵan deıin Alakól jaǵalaýynda 2018 jyldan beri jóndeý jumystary júrgizilmegenin jazǵanbyz.
Sondaı-aq aýdanynyń ákimi Almas Ábdınov Alakóldegi demalys quny týraly pikir bildirdi.