Alakól turǵyny ańshy myltyǵymen atyp ketken jigit aýrýhanada kóz jumdy
TALDYQORǴAN. QazAqparat - Almaty oblysynyń Alakól aýdanynda 21 jastaǵy jigit oq tıgen jigit, aýrýhanada kóz jumdy, dep habarlaıdy QazAqparat tilshisi.
19 tamyzda saǵat 03:30-da Alakól aýdandyq PB kezekshi bólimine Úsharal qalasyndaǵy aýdandyq aýrýhanaǵa 21 jastaǵy turǵynnyń oq jaraqatymen jetkizilgeni týraly habar kelip túsken. Oq tıgen jigit qaıtys bolǵan. Osy derek QR Qylmystyq kodeksiniń 24-babynyń 3-bóligi, 99-babynyń 9-tarmaǵynyń 2-bóligi boıynsha resmı tirkelgen soń polıtsııa qyzmetkerleri oqıǵanyń mán-jaıyn anyqtaýǵa kiristi.
«Úsh saǵat ishinde kórshi aýyldyń 23 jastaǵy turǵyny kúdikke ilindi. Esh jerde jumys istemeıtin ol oqıǵa ornynan izin sýytqan. Usynylǵan bultartpas aıǵaqtar negizinde kúdikti aýyr qylmys jasaǵanyn moıyndady», - dedi Alakól aýdandyq polıtsııa bólimi bastyǵynyń orynbasary Saıat Slıamov.
Tekserý barysynda qylmys ornynyń mańyndaǵy qaraýsyz qalǵan ǵımarattan ańshy myltyǵy tabyldy. Sondaı-aq, jalǵyz uńǵyly taǵy bir ańshy myltyǵy qamys arasynan sýdan shyǵaryldy.
«Tergeý barysynda anyqtalǵany, jastar arasyndaǵy kıkiljińniń sońy tóbeles pen adam ólimine ákep soqqan. Qazirgi ýaqytta kúdikti ustalyp, ýaqytsha ustaý ızolıatoryna qamaldy», - dedi Saıat Slıamov.
