Alakól men óńir týrızmin damytýǵa baǵyttalǵan Jol kartasy tanystyryldy
SEMEI. KAZINFORM — Memleket basshysy Qasym-Jomart Toqaev «Jasandy ıntellekt dáýirindegi Qazaqstan: ózekti máseleler jáne ony túbegeıli tsıfrlyq ózgerister arqyly sheshý» atty bıylǵy Joldaýynda týrızm salasyna erekshe mán bergen bolatyn.
Búgin Semeıde oblys ákimi Berik Ýálıdiń tóraǵalyǵymen týrızm salasynyń ózekti máselelerine arnalǵan jıyn ótti. Oǵan oblystyq basqarmalar, kásipkerler palatasy, týrıstik kompanııalar men demalys oryndarynyń ókilderi qatysty.
— Týrızm — elimizdiń áleýmettik-ekonomıkalyq damýynyń mańyzdy baǵyttarynyń biri. Memleket basshysy Qasym-Jomart Kemeluly Toqaev bıylǵy halyqqa arnaǵan Joldaýynda osy salaǵa aıryqsha nazar aýdarǵany belgili. Prezıdenttiń tapsyrmasyna sáıkes oblys ákimdigi bıyl Alakólge erekshe kóńil bóldi. Naýryz aıynan bastap ózim birneshe ret baryp, kóshpeli jıyndar ótkizdim. Jaǵalaýǵa 2018 jyldan beri jóndeý júrgizilmegenin eskere otyryp, oblystyq bıýdjetten 658 mln teńge bóldik. Týrızmdi damytýda kásipkerlerdiń róli aıryqsha. Bul sala sizderdiń qoldaýlaryńyzsyz damymaıdy. Sol sebepti búgin sizdermen arnaıy kezdesip, ózekti máselelerdi birge talqylap, sheshý joldaryn qarastyrýdy jón kórdim, — dedi aımaq basshysy.
Jıynda oblystyq týrızm basqarmasynyń basshysy Marat Qabaqov óńirdegi týrızm, Alakól týrıstik aımaǵyn damytý josparlary týraly baıandady.
Qazirgi tańda Abaı oblysynda týrızmdi damytýǵa erekshe kóńil bólinip, Alakól jaǵalaýyn abattandyrý baǵytynda aýqymdy jumys júrgizilýde. Kól jaǵalaýyndaǵy ınfraqurylymdy nyǵaıtý úshin oblystyq bıýdjetten qarjy bólinip, arbatty jóndeý, jańa qoǵamdyq keńistik qurý, kóshelerdi ortasha jóndeý, pırster ornatý jáne jaǵalaýdy sanıtarlyq tazalaý jumystary atqaryldy. Sonymen qatar 2025-2027 jyldarǵa arnalǵan Jol kartasy ázirlenip, jalpy quny 8,4 mlrd teńge bolatyn jobalar josparǵa engizildi. Olardyń qatarynda jańa elektr jelisi, qatty turmystyq qaldyqtar polıgony, tazartý qurylystary, qutqarý stantsııasy men órt sóndirý deposynyń qurylysy bar.
Kezdesý barysynda Abaı oblysy kásipkerler palatasynyń dırektory Maqsat Súıchinov, «S.G. travel» týrısttik operator kompanııasynyń dırektory Aıman Jakýpova, «Erasyl» demalys bazasynyń dırektory Erasyl Dıqanbaev jáne taǵy da basqa demalys úıleriniń ıeleri óńir týrızmin damytýǵa qatysty usynystaryn aıtty. Atap aıtqanda, Altyn adam tabylǵan Eleke sazy, tarıhı oryndar kóp shoǵyrlanǵan Abaı aýdany, Kýrchatov qalasynda ǵylymı týrızmdi jetildirý, joldar men ınternet jelisin jaqsartý, aqparattyq belgilerdi ornatý, gıdterdi daıarlaý jáne qyzmet sapasyn arttyrý, balalar týrızmin damytý, kásipkerlerdi qoldaý, ekologııalyq týrızmdi órkendetýge baılanysty oılaryn ortaǵa saldy.
— Búgingi kezdesýdiń biz úshin mán-mańyzy erekshe. Sebebi, Abaı oblysy deńgeıinde týrızm salasynyń ókilderi men aımaq basshylyǵy alǵash ret bir ústel basyna jınalyp otyr. Bul — salanyń damýy úshin mańyzdy qadam, ortaq únqatysýdyń bastamasy, — dedi «S.G. travel» týrısttik operator kompanııasynyń dırektory Aıman Jakýpova.
Jıyn qorytyndysynda aımaq basshysy kezdesýde kóterilgen máseleler men usynystardyń barlyǵy eskeriletinin atap ótti.
— Búgingi kezdesýde ashyq áńgime órbidi dep oılaımyn. Qundy pikirler aıtyldy. Sizdermen árdaıym ashyq baılanysta bolyp, seriktestik ornatýǵa daıynbyz. Týrızm salasynda ózekti máseleler bar. Ortaq maqsatymyz — Abaı oblysynyń tartymdy jerlerine týrısterdi tartyp, elimizdiń týrıstik óńirleriniń birine aınaldyrý, — dedi oblys ákimi.