Alakól mańyndaǵy jańa áýejaıǵa qaıta jóndeý júrgiziledi
«Kóptegen adamdar áýejaıdy qaıta jóndeýdiń ne qajeti bar dep oılaıdy. 2015 jyly Elbasy Qorǵanys mınıstrliginiń balansynda turǵan áýejaıdy bizge berýdi tapsyrdy. Bul oryndaldy. Birinshi kezekte jergilikti bıýdjet esebinen ádemi termınal – aerovokzal ǵımaraty salyndy. Qazir ol tabysty jumys istep tur, Nur-Sultan, Taldyqorǵannan ushaqtar qabyldaıdy. Osynyń arqasynda demalýshylar sany artyp keledi. Biraq ushý-qoný jolaǵynyń jaı-kúıi kóńil kónshitpeıdi. Sol úshin jaqyn kórshilerimizden ótinishter túsip jatyr. Olar Alakólge ózderiniń charterlik ushaqtarymen ushqysy keledi. Biraq ushý-qoný jolaǵy oǵan múmkindik bermeıdi», - dedi A. Batalov QR Prezıdenti janyndaǵy Ortalyq kommýnıkatsııalar qyzmetinde ótken baspasóz máslıhatynda.
Ol úshin eki bólikten turatyn jobalyq-smetalyq qujattama ázirlendi: ushý-qoný jolaǵyna 4,7 mlrd teńge jáne aeronavıgatsııaǵa, aýmaqty qorshaýǵa, kúzet dabyl júıesin ornatýǵa, jaryqtandyrýǵa 2,5 mlrd teńgege jýyq qarajat bólingen.
«Bizdi Úkimet qoldady jáne bizge 4,7 mlrd teńge bólindi. Tender rásimin ótkizip, jaqsy merdigerlerdi aldyq. Muny jyl sońyna deıin ıgerýimiz kerek. Jóndeý jumystaryn júrgizsek, bizge Boeing 737 ushaǵy qona alady, sonda týrıster aǵyny da artady. Qalǵan 2,5 mlrd teńge jergilikti bıýdjetten bólindi», - dep túsindirdi Amandyq Batalov.
