Alakól qoryǵynda qustardyń 330 túri mekendeıdi
ASTANA. KAZINFORM – Alakól memlekettik tabıǵı qoryǵy – sırek kezdesetin qustar men janýarlardyń mekeni ári halyqaralyq mańyzy bar sýly-batpaqty alqaptardyń biri, dep habarlaıdy Ekologııa jáne tabıǵı resýrstar mınıstrligi.
Alakól memlekettik tabıǵı qoryǵy 1998 jyly Tentek ózeni atyraýynyń janýarlar men ósimdikter álemin, sondaı-aq Alakól kólindegi Araltóbe araldarynda mekendeıtin kóne dáýir shaǵalasynyń erekshe popýlıatsııasyn saqtaý maqsatynda qurylǵan.
Qoryq aýmaǵy 65 672 gektardy quraıdy. Onyń 17 877 gektary Jetisý oblysynyń Alakól aýdanynda, 47 795 gektary Abaı oblysynyń Úrjar jáne Maqanshy aýdandarynda ornalasqan.
– Bul óńir qustardyń Ortalyq Azııa – Úndi mıgratsııalyq jolynda ornalasqan. Osyǵan baılanysty Alakól-Sasyqkól kólder júıesi 2009 jyly Ramsar konventsııasynyń tizimine engizilip, álemdik mańyzy bar sýly-batpaqty alqap mártebesin aldy, – delingen habarlamada.
2013 jyly Alakól qoryǵy ıÝNESKO-nyń bıosferalyq rezervattar jelisine qosyldy.
Alakól qoryǵy Qazaqstandaǵy sýly-batpaqty qustardyń negizgi uıa salatyn, túleıtin jáne qonys aýdarý kezinde aıaldaıtyn eń iri oryndarynyń biri sanalady.
Qoryqta qustardyń 330 túri tirkelgen. Onyń ishinde 133 túri qoryq aýmaǵynda turaqty uıa salady, al 16 túri Qazaqstannyń Qyzyl kitabyna engizilgen. Kóne dáýir shaǵalasy Alakóldiń sımvoly sanalady.
Sondaı-aq qoryq aýmaǵynda sútqorektilerdiń 35 túri mekendeıdi. Olardyń qatarynda qaban, túlki, borsyq, elik, qoıan, ondatr jáne qasqyr bar.
Alakól sý aıdyndarynda balyqtyń 18 túri kezdesedi. Onyń 9 túri jergilikti balyqtarǵa jatady. Sonymen birge Balqash-Alakól oıpatynyń endemıkteri sanalatyn balqash alabuǵasy men balqash qarabalyǵy mekendeıdi.
Baýyrymen jorǵalaýshylardyń 10 túri, qosmekendilerdiń 2 túri qoryq aýmaǵynda tirkelgen. Olardyń ishinde danata qurbaqasy Qazaqstannyń Qyzyl kitabyna engizilgen.
– Qazirgi tańda Alakól qoryǵy aýmaǵynda jándikterdiń 392 túri belgili. Ósimdik jamylǵysynyń 290 túri ósedi. Tabıǵattyń bergeni men bereri adamzat úshin teńdesi joq baılyq. Sondyqtan barymyzdy baǵalap, tabıǵatty qorǵaý paryzymyz ekenin umytpaýymyz kerek, – dep atap ótti vedomstvodan.
Aıta keteıik, buǵan deıin Alakólde shomylý maýsymy qashan bastalatyny habarlanǵan bolatyn.
