Alakól – elimizdiń týrıstik brendi: depýtat ınfraqurylymdy damytý mańyzyn atap ótti
QYZYLORDA. KAZINFORM — Májilis depýtaty, «AMANAT» partııasy fraktsııasynyń múshesi Bolat Kerimbek Jetisý oblysyna jumys sapary aıasynda Alakól kóliniń jaǵalaýyndaǵy demalys oryndarynyń qazirgi jaǵdaıymen tanysty. Jetisý oblysy qurylǵannan beri Alakól aýdanyna 4,8 mln astam týrıst kelgen.
Depýtat kommýnaldyq jaǵajaı men birqatar týrıstik nysandy aralap, ınfraqurylym máselesine nazar aýdardy. Atap aıtqanda, sanıtarlyq tazalyq, káriz júıesi, kólik baqylaý jáne ınjenerlik ınfraqurylym jaıy qozǵaldy.
Májilis depýtaty Bolat Kerimbek ınfraqurylymdy jetildirý jumysyn ári qaraı jalǵastyrýdyń mańyzyn atap ótti.
– Alakól – tek Jetisý oblysynyń emes, tutas elimizdiń týrıstik brendi. Sońǵy jyldary munda aýqymdy jumystar júrgizildi. Elektr jaryǵy men ınternet máselesi sheshildi. Káriz júıesi salynyp jatyr. Biraq áli de júıeli sheshimdi qajet etetin máseleler bar. Biz úshin basty maqsat – tabıǵat baılyǵyn saqtaı otyryp, halyqqa jaıly jaǵdaı jasaý. Bul baǵytta memleket pen kásipkerlerdiń kúsh biriktirýi asa mańyzdy, – dedi depýtat.
Aıta keteıik, keıingi jyldary Alakól jaǵalaýynda ınfraqurylym edáýir jaqsardy. Týrıstik nysandar sany bir jylda 270-ten asty. Uzyndyǵy 56,7 shaqyrym elektr jelisi men qosalqy stansa salynyp, úzdiksiz jaryq berilip jatyr. Jaǵalaý ınternetpen qamtylyp, 16 bazalyq stansa ornatyldy. Aqshı aýylynda 69,7 shaqyrym káriz jelisi tartylyp, tazartý qurylǵysynyń qurylysy bastaldy. Bıyl sanıtarlyq jaǵdaıdy jaqsartý úshin 22 torap, 220 konteıner, 7 tehnıka berildi. Qaýipsizdikti qamtamasyz etý maqsatymen kólde 4 ınspektor, 12 qutqarýshy jáne 46 polıtsııa qyzmetkeri kezekshilik atqaryp jatyr.
Sonymen qatar «AMANAT» partııasynyń 2023-2027 jyldarǵa arnalǵan saılaýaldy baǵdarlamasy aıasynda Jetisý oblysyna qarasty Alakól, Kerbulaq, Panfılov aýdandary men Taldyqorǵan qalasynda 684,4 shaqyrym elektr jelilerin kúrdeli jóndeý kózdelip otyr.
Aıta ketelik Kazinform tilshisi Abaı oblysy Maqanshy aýdanyndaǵy Alakól demalys ornyna arnaıy baryp, fotoreportaj jasap qaıtqan edi.