Alakól demalys ornynda zańnamany óreskel buzýshylyqtar anyqtaldy
ÓSKEMEN. QazAqparat - Alakól jaǵalaýyndaǵy demalýshylarǵa arnalǵan úıler men demalys bazalary jumys istemeýi tıis. Bul sheshim Alakólde rekreatsııalyq aımaqta nysandardyń jaı-kúıin qaraǵan jumys tobynyń múshelerimen ótken májilis barysynda qabyldandy. Tekserý barysynda 147 baza men úılerdiń 80-inde qajetti qujaty joq bolyp shyqty. Keıbiri sanıtarlyq jáne órtke qarsy qaýipsizdik normalaryn saqtamaǵan. Jumys tobynyń Alakól jaǵalaýyna sapary barysynda osy jáne basqa da QR zańamasyn óreskel buzýshylyqtar anyqtaldy.
Demalys úılerin tekserýge óńir basshysy bastamashylyq etip, tıisti vedomstvo basshylaryna tapsyrma bergen. Tekserý barysynda jumys toby búginde Alakól jaǵalaýynda 147 baza men demalys úıi bar ekenin anyqtady. Onyń 80-inde qajetti qujat joq. Sáýlet, qurylys, qala qurylysy salasyndaǵy anyqtalǵan buzýshylyq saldarynan zańǵa sáıkes engizilmegen nysandardy paıdalanýdy toqtatýǵa 44 nusqama berildi. Jumys toby 160-tan astam baza men demalys úılerin qarady. Onyń ishinde dúken, dámhana, basqa da saýda núkteleri bar. Abattandyrý jumystary tek tórt nysanda ǵana júrgizilgen. Qalǵandaryna ony júrgizý qajettigi týraly nusqama berildi. Keıbirinde sanıtarlyq qaýipsizdikti buzýshylyqtar anyqtaldy. Órtke qarsy qaýipsizdik ótkir máselege dese bolady. Qurylystardyń kóbi aǵashtan jasalǵan. Osyǵan qaramastan, 140 nysanda órtke qarsy qaýipsizdikti óreskel buzǵan jaǵdaılar anyqtaldy. Sondaı-aq jer-jerlerde kólik ótetin kvartalaralyq joldar joq.
Jumys tobymen ótken jıynda Danııal Ahmetov Alakól jaǵalaýyn damytý josparyn ázirleýdi tapsyrdy. «Birde-bir nysan demalýshylarǵa jaǵdaı jasamaı, jumys istemeýi tıis. Barlyq anyqtalǵan kemshilikter boıynsha kásipkerlermen memorandým jasasý qajet. Kelesi demalys maýsymy bastalǵanǵa deıin kemshilikterdi joıý qajet, joımaǵandar jumysyn toqtatady», - dep atap ótti óńir basshysy. - memorandýmǵa bir aıdyń ishinde qol qoıylýy tıis, - dep habarlady óńirdiń aqparattyq ortalyǵynan.
Sonymen qatar, oblys ákimi bir aı ishinde Alakól jaǵalaýyn damytý josparyn daıyndaýdy tapsyrdy. Onda qaýipsizdik, jaǵajaı aımaqtaryn abattandyrý bóligindegi zańnama talaptaryn saqtaı otyryp, jol, turǵyn úı-kommýnaldyq ınfraqurylymdar salý kózdelgen.
