Alakól, Býrabaı, Katonqaraǵaı: Qazaqstan týrızmine mıllıardtaǵan ınvestıtsııa quıylyp jatyr
ASTANA. KAZINFORM — 2026 jyldyń toǵyz aıynda Qazaqstannyń týrızm salasyna tartylǵan ınvestıtsııa kólemi 68%-ǵa ósip, 1,3 trln teńgeden asty. Sonymen qatar elde úsh jańa áýejaı salynyp, ondaǵan týrıstik ınfraqurylym jobasy júzege asyrylyp jatyr. Bul týraly Týrızm jáne sport mınıstrligi málim etti.
Bıylǵy birinshi jartyjyldyqta qonaqúıler men ózge de ornalastyrý oryndary 5 mln-ǵa jýyq adamǵa qyzmet kórsetti. Bul 2025 jyldyń sáıkes kezeńinen 5%-ǵa kóp. Kórsetilgen qyzmet kólemi 15%-ǵa ósip, 173,7 mlrd teńgeni qurady. Týrızm salasynda 565 myńnan astam adam eńbek etedi. Bul — eldegi jumyspen qamtylǵandardyń jalpy sanynyń 6%-y.
Vedomstvonyń málimetinshe, bıyl óńirlerde jalpy quny 19,5 mlrd teńge bolatyn 15 týrıstik ınfraqurylym jobasy aıaqtaldy. Jyl sońyna deıin quny 159 mlrd teńge bolatyn taǵy 38 jobany aıaqtaý josparlanyp otyr. Sonymen qatar 2025-2026 jyldary jalpy somasy 78 mlrd teńgege 64 ınvestıtsııalyq joba iske asyrylyp, 2 myńǵa jýyq turaqty jumys orny ashyldy.
Jetisý oblysynda Alakól jaǵalaýyn bekitý jumystary jalǵasyp jatyr. Jobanyń jalpy quny — 17,8 mlrd teńge. Oǵan 2025-2026 jyldary 5,5 mlrd teńge bólindi, taǵy 10,5 mlrd teńge Infraqurylymdyq damý qorynan kózdelgen. Almaty oblysynda Qaıyńdy kóline jáne «Kóshpendiler qalasy» týrıstik nysanyna aparatyn joldar salyndy. Abaı oblysynda quny 7,9 mlrd teńge bolatyn «Alakól — Kóktal» elektr jelisiniń qurylysy júrip jatyr.
Memleket basshysynyń tapsyrmasyna sáıkes Şýche-Býrabaı kýrortty óńirin, Mańǵystaý týrıstik óńirin jáne Almaty taý klasterin keshendi damytý josparlary bekitildi. Olarda barlyǵy 293 is-shara qarastyrylǵan. Onyń 61-i oryndaldy, taǵy 232-si iske asyrylyp jatyr.
— Bıyl týrıstik avtobýstar úshin uıymdasqan týrıstik toptardyń memlekettik shekaradan ótýin jeńildetetin «jasyl dáliz» tetigi engizildi. 18 jasqa deıingi balalarǵa ulttyq parkterge kirý tegin boldy. Ulttyq parkterdiń jer ýchaskelerin uzaq merzimdi paıdalaný merzimi 25 jyldan 49 jylǵa deıin uzartyldy, — delingen mınıstrliktiń habarlamasynda.
Bıylǵy toǵyz aıda 24 jańa halyqaralyq áýe baǵyty ashyldy. Qazir 31 elmen 137 baǵyt boıynsha halyqaralyq áýe qatynasy jolǵa qoıylǵan. Kendirli, Zaısan jáne Katonqaraǵaıda úsh jańa áýejaı salynyp jatyr.
Aıta keteıik, buǵan deıin Qazaqstanda týrızmnen túsken salyq túsimderi 303 mlrd teńgege jetkenin jazdyq.