Alakól, Balqash kólderinen zańsyz balyq aýlaý tyıylmaı tur
TALDYQORǴAN. QazAqparat - Almaty oblysynyń Alakól, Balqash kólderinde brakonermen kúres júrip jatyr. Respýblıkalyq «Brakoner» jedel profılaktıkalyq is-sharasy 17 maýsymǵa deıin jalǵasady, dep habarlaıdy QazAqparat tilshisi.
Sońǵy bes aıdyń ishinde zańsyz balyq, ań aýlaǵandardyń ústinen 15 qylmystyq is qozǵalǵan.
«Onyń ishinde 7 qylmystyq is QR QK-niń 335 baby ıaǵnı, balyq resýrstaryn, basqa da sý janýarlaryn zańsyz aýlaý faktisi boıynsha, 8 qylmystyq is QR QK-niń 337 baby ıaǵnı, zańsyz ań aýlaǵany úshin qozǵalǵan. Qazirgi tańda 9 qylmystyq is Balqash aýdandyq sotyna zańdy sheshim qabyldaný úshin joldandy», - dedi Balqash aýdandyq Polıtsııa bólimi bastyǵynyń birinshi orynbasary Nurgeldi Ábırov.
Sonymen qatar, 2021 jyldyń 4 aı qorytyndysy boıynsha balyq aýlaý qaǵıdalaryn óreskel buzǵany úshin ákimshilik jaýapkershilikke tartý maqsatynda 59 jeke tulǵaǵa qatysty is-materıaldary sot organdaryna joldandy.
«Zań buzýshylardan jyl basynan 3,9 tonna zańsyz aýlanǵan balyq, 66 aý quraldary jáne 5 júzý quraldary tárkilendi.
Quqyq buzýshylarǵa 4 mln 280 myń teńge aıyppul salyndy. Al balyq resýrstaryna keltirilgen zalal úshin 1 mln 963 myń teńge talap qoıyldy», - delingen Balqash-Alakól oblysaralyq basseındik balyq sharýashylyǵy ınspektsııasynyń jarııalaǵan habarlamasynda.
Brakonerlerdiń aldyn alý is-sharasy 17 maýsymǵa deıin jalǵasady.
