Alakól, Balqash, Býrabaı: eldegi týrıstik baǵyttarda qaýipsizdik kúsheıtildi
ASTANA. KAZINFORM – Qazaqstan 2026 jylǵy jazǵy týrıstik maýsymǵa daıyndalyp jatyr. Bıyl osy jumystar aıasynda eldegi segiz negizgi týrıstik aımaqta tekserý jumystary júrgizildi. Olardyń qatarynda Alakól, Balqash, Býrabaı, Kaspıı teńiziniń jaǵalaýy jáne Shyǵys Qazaqstandaǵy týrıstik baǵyttar bar.
Óńirlerde qutqarý beketteri, sanıtarlyq-gıgıenalyq nysandar, kommýnaldyq jaǵajaılar men vızıt-ortalyqtar salynyp jatyr. Sonymen qatar qoǵamdyq qaýipsizdik sharalary kúsheıtilip, beınebaqylaý júıeleri keńeıtilý ústinde, dep málimdedi búgin QR Týrızm jáne sport mınıstrligi Týrızm ındýstrııasy komıteti tóraǵasynyń mindetin atqarýshy Nurbol Baıjanov baspasóz máslıhatynda.
Baspasóz máslıhaty Týrızm jáne sport mınıstrliginiń ákimdiktermen jáne salalyq memlekettik organdarmen birlesip, týrısterdiń qaýipsizdigin qamtamasyz etý, ınfraqurylymdy damytý jáne týrıstik qyzmet sapasyn arttyrý baǵytynda júrgizilip jatqan juystaryna arnalǵan edi.
Nurbol Baıjanov elimizde ásirese kýrortty óńirlerdegi kólik qoljetimdiligi men jazǵy maýsymdaǵy joǵary júktemege erekshe nazar aýdarylyp otyrǵanyn jetkizdi.
Onyń sózinshe, Qaraǵandy oblysynda Balqash týrıstik klasterin damytý, áýejaıdy jańǵyrtý jáne jańa áýe baǵyttaryn ashý jumystary júrip jatyr. Aqmola oblysynda Býrabaı kýrortyn jańǵyrtý jobasy júzege asyrylyp, avtoturaqtar men týrıstik ınfraqurylym nysandary damý ústinde.
Almaty oblysynda Qonaev qalasyndaǵy kommýnaldyq jaǵajaılardy jańartý, jol jelisin damytý jáne ulttyq parkterdi abattandyrý jumystary júrgizilip jatyr. Jetisý óńirinde Alakól jaǵalaýynyń kólik qoljetimdiligi qamtamasyz etilip, Úsharalǵa áýe reısteri men temirjol qatynasy kúsheıtiledi. Mańǵystaý oblysynda jaǵajaılar men jaǵalaý aýmaqtary jańartylyp, qaýipsizdik jáne servıstik ınfraqurylym keńeıip keledi.
Shyǵys Qazaqstan jáne Pavlodar oblystarynda týrıstik klasterlerdi damytý, týrıstik nysandarǵa aparatyn joldardy jóndeý, ornalastyrý oryndaryn salý jáne demalys aımaqtaryn abattandyrý jumystary jalǵasyp jatyr.
Sonymen qatar oqıǵalyq týrızmdi damytýǵa erekshe kóńil bólinýde. Respýblıkalyq is-sharalar kúntizbesine mádenı, sporttyq jáne gastronomııalyq baǵyttaǵy 55 iri is-shara engizilgen.
Osyǵan deıin bıyl elimizde birneshe týrıstik baǵyt jańaryp, jańa demalys aımaqtary paıdalanýǵa beriletini týraly jazǵan edik.
