Alakól baǵytyndaǵy vokzaldar jóndelmek: Aqshı stantsııasynyń beketi táýlik boıy jumys isteıdi
ASTANA. KAZINFORM — Jolaýshylardyń jaılylyǵy úshin Alakól baǵytyndaǵy vokzaldarda qajetti jaǵdaılar jasalyp jatyr. Bul týraly «Qazaqstan temir joly» UK» AQ baspasóz qyzmeti málimdedi.
— Demalýshylar arasynda tanymal Jalańashkól jáne Kóktuma stantsııalary vokzaldarynda jolaýshylar poıyzdarynyń qozǵalys kestesin eskere otyryp, qyzmetkerlerdiń jyljymaly jumys kestesi uıymdastyryldy. Aqshı stantsııasynyń vokzaly táýlik boıy jumys isteıdi, — dep jazdy Ulttyq tasymaldaýshy kompanııa.
Jazǵy maýsym qarsańynda vokzaldarda sanıtarlyq aımaqtar, kútý aımaqtary jańartyldy, jaryqtandyrý jaqsartyldy jáne irgeles aýmaq jabdyqtaldy. Jolaýshylardy ýaqtyly habardar etý úshin barlyq vokzaldarda daýys zorıtqysh baılanys júıesimen qamtylǵan.
Jalańashkól jáne Aqshı stantsııalarynda bılet kassalary jumys isteıdi.
Qazaqstan Respýblıkasy Úkimetiniń Qaýlysyna sáıkes vokzal sharýashylyǵy obektilerin jańǵyrtý jumystary bastaldy, aǵymdaǵy jyly Jalańashkól, Aqshı jáne Kóktýma stantsııalary vokzaldarynda jóndeý jumystaryn júrgizý josparlanǵan.
Eske sala keteıik, buǵan deıin «Jolaýshylar tasymaly» AQ jazǵy kezeńde joǵary suranysqa ıe týrıstik baǵyttarda 12 qosymsha marshrýtty iske qosqanyn jazǵan edik. Onyń ishinde Alakólge jazda 240 myń jolaýshy temirjol kóligimen tasymaldanbaq.