Alakól áýejaıy shildede iske qosylyp, kúnine 500 jolaýshy qabyldaıdy

TALDYQORǴAN. QazAqparat - Jetisý oblysyndaǵy Úsharal áýejaıynda ushyp-qoný jolaǵy keńeıtilip, qaıta jańǵyrtylyp jatyr. Osyǵan baılanysty oblys ákimi atalǵan nysanǵa bardy, dep habarlaıdy QazAqparat tilshisi.

Jumys aıaqtalǵanda Úsharalǵa úlken ushaqtar da esh kedergisiz qatynamaq.

«Jetisý» áýe kompanııasynyń prezıdenti Qaltaı Dóńsebaevtyń aıtýynsha, ushaq qonatyn jol tolyq jańartylyp bolyp qaldy. Qurylys kompanııasy jumysyn aldaǵy shilde aıynyń ortasynda tolyq bitiredi dep josparlanǵan.

Sonda kúnine 8 reıs qatynap, 500-deı jolaýshy qabyldanatyn bolady.

Balqash kóline aparatyn joldyń qurylysy da nazardan tys qalmaı, Almaty – Óskemen – Lepsi – Aqtoǵaı jáne Lepsi – Balqash kóli baǵytyndaǵy joldar qaraldy.

Balqashqa deıingi jol qazir 3-sanattan 2-shi sanatqa aýystyrylyp, tolyq jańǵyrtýdan ótkizilip jatyr. 35 shaqyrymynda jumys aıaqtalǵan.

Jol boıynda birneshe jerde aıaldama kesheni, estakada, zamanǵa saı ájethana qoıylady.

Atalǵan jol qurylysy jobasy kezeń-kezeńimen qarjy bólinýine qaraı jalǵasady.

Jol sapasyna oń baǵa bergen oblys ákimi Beıbit Isabaev:

«Alakóldegi demalys aımaqtaryna ınfraqurylym tartý, jol jóndeý jumysymen tanystym. Jol jóndelip bitkennen keıin Balqash pen Alakólge keletin týrısterdiń qatary ósedi. Úsharal áýejaıy iske qosylsa, qatynaıtyn ushaq kóbeıedi. Bul halyqtyń turmys jaǵdaıyna, óńirdiń áleýmettik-ekonomıkalyq ahýalyna oń áser etedi», - dedi B.Isabaev.

Osy sapar aıasynda oblys basshysy Lepsi aýyldyq okrýginde, taý baýraıynda ótip jatqan etti baǵyttaǵy mal sharýashylyǵyn damytýǵa arnalǵan «Lepsi-2022» halyqaralyq kórmesine bardy.

Onda asyl tuqymdy mal ósiretin sharýashylyqtar tórt túlikterin kórmege ákelip, kópshiliktiń qyzyǵýshylyǵyn týǵyzdy.

Jıyn barysynda oblys ákiminiń Qurmet gramotasy birqatar seriktestikterdiń mehanızatorlaryna, shopany men brıgadırine tabystaldy.