Jetisý oblysynda aýyzsýdy ózennen tasyp, iship otyrǵandar bar
TALDYQORǴAN. KAZINFORM — Lepsi aýylynyń turǵyndary 50-60 jyldan beri aýyzsýdy tasyp iship otyr. Qudyqtan alys turatyndary ózen sýyn paıdalanady.
Lepsi — Alakól aýdanynda shetkeri jatqan shekaralyq aımaqta ornalasqan aýyl. 330-daı úı, 1000-nan asa turǵyny bar.
Sonyń jartysynan kóbi XXI ǵasyrda bulaq sýyn tasyp iship otyr. Osydan 50-60 jyl buryn bastaýlardyń sýyn jınap, aýyl ishine qolmen qubyr tartylǵan kórinedi. Taý jaqtan kúni-túni toqtaýsyz aǵyp turatyn ashyq sý 3 jerde bar. Qudyq deýge kelmeıtin jińishke sol qubyrlardan halyq sý alady.
— Jarty shaqyrym jerdi jaıaý júrip, kópirden ótip, ózennen sý tasyp iship otyrǵandar bar. Sumdyq qoı. Aýylǵa sport keshenderin salyp jatyr. Ol árıne kerek shyǵar, biraq halyqqa eń birinshi sý men jol kerek qoı. Aýdan ákimi de, aýyl ákimi de muny kórmeıdi. Jylda jıyn jasaıdy da kelesi jyly, kelesi jyly dep ketedi. Ýádelerine toıdyq, 15 jyl boldy. Kósheniń arǵy basynan sýdy kúnde shanamen tasyp ishemiz. Úıimizge kirgizip bermeı-aq qoısyn óz kóshemizge qudyq qoıyp bersinshi eń bolmasa. Jetkizińizdershi joǵarydaǵylarǵa, bizge kómektessin, — dedi aýyl turǵyny, zeınetker Valerıı Lıvınskıı.
Taýdan tartylǵan qubyrǵa jaqyn turǵyndar sýdy úı ishine deıin nasos ornatý arqyly kirgizip alǵan. Al jerdi qazyp sý shyǵarý qııamet. Taza sý 50 men 180 metr aralyǵyndaǵy tereńdikte jatyr. Aýyl halqymen birge ózim de sýdy tasyp ishem degen Lepsi aýyly ákiminiń sózine sensek, bıyl qurylys bastalady, sý máselesi 1-2 jylda tolyq sheshiledi.
— 2024 jyly ekspertıza men smetalyq qujattar ázirlenip, oń qortyndysyn aldyq. Jalpy bólinetin qarajat 2 mlrd 900 mln-daı. Bıyl onyń 800 mln-y bólindi. «Sapa qurylys» kompanııasy utty. Jazǵa salym jumys bastalady. Aýyl kóshelerine qubyr tartylady. Keıin árkim óz úıine kirgizip alady. Ózennen sý alyp otyrǵan sanaýly ǵana turǵyn bar shyǵar. Negizi bári aýyldaǵy 3 qudyqtan alady. Ózim de sýdy elmen birge tasyp ishemin, — dedi Lepsi aýyldyq okrýgynyń ákimi Berik Áýkenov.
Tasyp aqqan Lepsi men Tentek ózenderiniń jaǵasynda otyryp, aýyzsýdy jaz arbamen, qys shanamen tasyp mezi bolǵan aǵaıyn taza sý shańyraǵymyzǵa tezirek kelse dep tileıdi. Eske salaıyq osyǵan deıin Alakól aýdanynda úsh aýyldyń jol azabyn tartyp otyrǵanyn jazǵanbyz.