Alaqanǵa syıyp ketetin kitap oqyp kórdińiz be
PAVLODAR. KAZINFORM — S. Toraıǵyrov atyndaǵy oblystyq kitaphanada kólemi alaqanǵa syıyp ketetindeı 150-ge tarta kitap bar. Jýyrda kollektsııa jańa týyndymen tolyqty.
Ombylyq áriptesteri kitaphanaǵa «Ombydaǵy pýshkınıana» mınıatıýralyq kitabyn syıǵa tartty.
Mınıatıýrlik basylymdar oqyrmandar arasynda erekshe qyzyǵýshylyq týdyrady. Sırek kitaptar qoryndaǵy mundaı jınaqtar oqyrman qolyna berilmeıdi. Tek oqyrman zalynda alyp qaraýǵa múmkindik bar.
Kitap qorynyń basshysy Baqytjan Buqashevanyń aıtýynsha, kólemi shaǵyn kitaptardyń ishinde kórkem ádebıet jáne salalyq týyndylar saqtalyp otyr. Deni qazaq jáne orys jazýshylarynyń shyǵarmalary. Eń kishisi Omar Haıamnyń 50×70 mm ólsheminde shyǵarylǵan jınaǵy eken. Munda Pýshkın týraly ádebıetter katalogy da bar.
Sırek kitaptar bóliminiń basshysy Marına Goncharova árbir kitap ózinshe qundy deıdi. Halyqaralyq standarttarǵa sáıkes, uzyndyǵy men eni 3 dıýım, ıaǵnı 76 mıllımetrden aspaıtyn kitaptar mınıatıýralyq basylym bolyp sanalady eken.
— Mekemede sırek kezdesetin kitaptar jınaqtalǵan bes zal bar. Onda qundy jáne sırek kezdesetin kitaptar kezdesedi. On toǵyzynshy ǵasyrdyń aıaǵy men jıyrmasynshy ǵasyrdyń basynda jaryq kórgen kitaptar bar. Avtorlardyń qoltańbalary saqtalǵan. Odan keıingileri faksımıldi qaıta basylyp shyqqan jáne mınıatıýralyq kitaptar, — deıdi maman.
Shaǵyn kólemdi kitaptar 17-18-ǵasyrlarda asa tanymal bolǵan eken. Olar el arasynda kádesyı retinde júripti. Mazmuny men qundylyǵy jaǵynan kádimgi kitaptan eshqandaı aıyrmashylyǵy joq. Tek shaǵyn taralymmen shyǵyp otyrǵan.
Pavlodarlyq kitaphanadaǵy mınıatıýrlik basylymdar qorynda Juban Moldaǵalıevtiń poemalary, Muhtar Áýezovtiń «Abaı joly» romanynan úzindiler, ózge de tanymal avtorlardyń týyndylary bar. Eń bastysy shaǵyn kitaptar qatary tolyǵyp otyrady. Eń jańasy — aqyn Vıktor Semerıanovtyń «Máshhúr shyńy» poemasy.
Eske sala keteıik, Pavlodarda neolıt kezeńińde jasalǵan qysh qumyralar saqtalyp tur.