«Aladdin» platformasynda Qazaqstannyń halal ónimderin saýdalaý máselesi pysyqtalýda

KÝALA-LÝMPÝR QazAqparat – Qazaqstan Elshiligi QR Saýda jáne ıntegratsııa mınıstrliginiń jáne malaızııalyq «Aladdin» kompanııasynyń qatysýymen halal ónimderimen saýda jasaý máselesine qatysty beınekonferentsııa uıymdastyrdy, dep habarlaıdy QazAqparat.

Іs-sharaǵa Elshi Bolat Imanbaev, Saýda jáne ıntegratsııa vıtse-mınıstri Ásel Janasova, «QazTrade» saýda saıasatyn damytý ortalyǵy» AQ marketıng jáne elektrondyq kommertsııa departamentiniń dırektory Ójet Shegirbaev, «Aladdin» kompanııasynyń negizin qalaýshy jáne basshysy Desmond To jáne ózgeler qatysty.

Kezdesý barysynda elektrondy saýda, «Aladdin» platformasyndaǵy halal ónimderiniń saýdasy, qazaqstandyq kompanııalardyń Ońtústik-Shyǵys Azııa (OShA) naryǵyna jáne malaızııalyq kompanııalardyń Ortalyq Azııa jáne Eýrazııalyq ekonomıkalyq odaq naryqtaryna shyǵý salasyndaǵy ózara árekettesý múmkindikterin talqylady.

Kompanııa basshylyǵy elektrondy saýda jáne halal ındýstrııasy salasyndaǵy OShA naryǵy týraly, «Aladdin»-niń jumysy, platformadaǵy saýda-sattyq qaǵıdattary jáne tirkelý týraly tolyq aqparat berdi.

Beınekonferentsııa nátıjesinde taraptar arasynda ózara tıimdi yntymaqtastyqty damytýǵa ýaǵdalasty. Atap aıtqanda, óz taýarlaryn OShA naryqtaryna shyǵarý úshin qazaqstandyq kompanııalardyń tizimin pysyqtaý, «Aladdin» kompanııasyn «Astana» halyqaralyq qarjy ortalyǵy negizinde tirkeý jáne QR Saýda jáne ıntegratsııa mınıstrligimen yntymaqtastyq týraly memorandýmǵa qol qoıý kelisildi.