«Alabıno» polıgonynda Armııalyq halyqaralyq oıyndar-2019 saıysy bastaldy
Bıylǵy jyly oıyndar tamyzdyń 3-i men 17-i aralyǵynda 10 memlekettiń 21 áskerı polıgonynda, Kaspıı, Baltyq teńizderi men Parsy shyǵanaǵynyń sý aıdyndarynda ótedi.
Bul oıyndardy Reseı, Qazaqstan, Ázerbaıjan, Armenııa, Belarýs, Iran, Qytaı, sondaı-aq alǵash ret Ózbekstan, Mońǵolııa jáne Úndistan óz jerlerinde ótkizedi. Jyldan jylǵa qaraı halyqaralyq oıyndarǵa degen qyzyǵýshylyq arta túsýde. Sonymen birge, qatysýshy elderdiń sany da ulǵaıýda. Osy jyly úzdik degen ataqqa, júldeli oryndar men marapatqa Azııa, Eýropa, Afrıka, Ortalyq jáne Latyn Amerıkanyń 39 elinen 223 komanda baq synasatyn bolady.
Armııalyq oıyndardyń baǵdarlamasyna dalalyq, áýe jáne teńiz mashyǵy boıynsha 32 baıqaý kiredi. Qazaqstan komandasy onyń 16 baıqaýyna qatysady. Ótken oıyndarda Qazaqstan Qarýly Kúshteriniń quramasy kóshbasshylar úshtiginde boldy. Bıylǵy jyly áskerı qyzmetshilerimiz joǵary nátıjelerge qol jetkizýge nıettenip otyr.
Saltanatty ashylý rásimine Qazaqstan, Reseı, Ázerbaıjan, Belarýs qorǵanys mınıstrleri, sondaı-aq qatysýshy elderdiń resmı delegatsııalary qatysty.
Ótken jyldardyń tájirıbesine súıensek, áskerı saıystyń kórermenderi men áýesqoılary arasynda «Tank bıatlony» kóshbasshy bolyp tabylatynyn senimmen aıtýǵa bolady. Bir sózben aıtqanda, tank ekıpajdarynyń alǵashqy dodasy 4 tamyzda ótedi. Basqa baıqaýlar da qyzyqty. Olardyń árqaısysynyń alańynda qyzý ári tartysty jarys ótpek. Áskerı ushqyshtar men baılanysshylar, dárigerler men kınologtar, mergender men artıllerııashylar, aspazshylar men ınjenerler, teńizshiler men desantshylar ózderiniń sheberlikterin pash etetin bolady. Armııalyq oıyndar aıasynda Mońǵolııa aýmaǵynda alǵash ret «At marafony» baıqaýy ótedi. Qatysýshylar arasynda bizdiń komandamyz da bar.
7 tamyzda Qazaqstanda Armııalyq halyqaralyq oıyndar-2019 bastalatynyn aıta ketken jón. Polıgondarymyzda «Artıllerııalyq oq atý sheberleri», «Suńqar ańshylyǵy» jáne «Senimdi qabyldaý» atty úsh baıqaý ótedi.
Armııalyq halyqaralyq oıyndar – bul halyqaralyq aýqymdaǵy aıryqsha is-shara. Saıys ártúrli elderdiń áskerı qyzmetshileri arasynda tájirıbe almasý jáne is júzinde mashyqty jetildirý alańy bolyp tabylady. Oıyndar halyqaralyq áskerı yntymaqtastyqty nyǵaıtýǵa sebepker bolatyny sózsiz.
