«Alıansqurylysınvest» úleskerlerdiń qatysýyndaǵy barlyq turǵyn úıdi 2011 jyldyń kúzine deıin aıaqtaýǵa ýáde etedi
ASTANA. Aqpannyń 17-si. QazAqparat /Gúlmıra Álıakparova/ - Ústimizdegi jyldyń basynda kepildikpen bostandyqqa shyqqan «Alıansqurylysınvest» qurylys kompanııasynyń bas dırektory Rınat Naımanov, qurylystary turalap qalǵan turǵyn úı keshenderin, onyń ishinde asa problemaly sanalatyn - «Lesnaıa polıana» turǵyn úı alqabyn 2011 jyldyń kúzine deıin tolyǵymen salyp bitirýdi ýáde etti.
Búgin atalmysh qurylys kompanııanyń Astanadaǵy keńsesinde elordalyq úleskerlerdiń problemalary men olardyń sheshilý joldaryn jarııa etýge arnalǵan baspasóz máslıhaty ótti, dep habarlaıdy QazAqparat.
R. Naımanovtyń aıtýynsha, búgingi kúni Astana qalasynda qurylystary aıaqtalmaı qalǵan 30-dan astam turǵyn úı nysanynda (barlyǵy 5 myń 329 páter) barlyǵy 4 myń úlesker bar. Ústimizdegi jyly olardyń 2,5 myńyn baspanaly etý kózdelýde. R. Naımanovtyń naqtylap bergenindeı, 5329 páterdiń 2010 jyly - 3871-i, 2011 jyldyń kúzinde - 1451-i tolyǵymen paıdalanýǵa beriledi, solaı úleskerlerdiń máselesi tolyǵymen sheshiledi dep kútilýde.
«Alıansqurylysınvesttiń» qala ishindegi qurylys nysandaryn aıaqtaý úshin «Samuryq-Qazyna» UÁQ»-nyń Jyljymaıtyn múlik qory (JMQ) «ATF» bank arqyly birneshe transhpen 6,6 mıllıard teńge baǵyttap otyr. Sondaı-aq JMQ, turǵyn úı qurylystarynyń jalǵasýyna - bos turǵan páterlerdi satyp alý arqyly qolǵabys etýde. Sondaı-aq qurylys kompanııasyna qutqarý qolyn sozǵandardyń biri «ATF» bank boldy. Qazir atalmysh Banktyń tikeleı qarjylandyrýymen birneshe túrǵyn úı kesheniniń qurylysyn márege deıin jetkizý múmkin bolyp otyr.
«Ústimizdegi jyly «Infınıtı» turǵyn úı kesheniniń 1-shi jáne 2-shi kezekterin sonymen birge, «Gratsııa» TK-niń 1-shi jáne 3-shi kezekterin tolyǵymen paıdalanýǵa beremiz. Osylaısha, bıyl myń jarym úleskerdiń máselesin sheshetin bolamyz. Al 2011 jyly «Gratsııa» TK-nyń 2-shi jáne 4-shi kezekterin jáne «ASI 33/23» keshenin iske qosamyz», - dep atap ótti kompanııa basshysy.
R.Naımanov, búgingi kúni asa problemaly qurylystardyń birine aınalǵan «Lesnaıa polıana» turǵyn úı aýmaǵynyń qurylysyna da toqtaldy. Aıta keteıik, «Lesnaıa polıana» jobasyn Qazaqstan Prezıdenti men Premer-Mınıstri qyzý qoldap, solaı seriktes qalaǵa aınalýy tıis bolǵan turǵyn úı alqabynyń jobasy 2006 jyly saltanatty túrde qabyldandy. Jalpy aýmaǵy 50 ga jerge «ekonom» sanattaǵy 8 myńnan astam páterdiń qurylysyn 2009 jyly aıaqtap bitirý kózdelgen edi. Alaıda búgingi kúnge deıin jańa shaǵyn aýdanda tek 849 otbasy ǵana qonys toıyn toılaı aldy.
R.Naımanovtyń sózine qaraǵanda, qazirgi ýaqytta «Lesnaıa polıananyń» 2-shi jáne 3-shi kezekterin aıaqtaý úshin (2010 jyldyń naýryz-tamyzynda) «ATF» bankten nesıelik zaım tartyldy, al 4-ten 10-shy kezekke deıingi úılerdiń qurylysyn bitirý úshin (2010 jyldyń qazany men 2011 jyldyń kúzi) JMQ-dan qosymsha 13 mıllıard teńgeden astam qarjy tartý boıynsha kelissózder júrgizilýde.
«Qazirgi ýaqytta JMQ jáne «ATF» bankimen jasalǵan kelisim boıynsha, qarjylandyrýdyń kólemi anyqtalyp, qujattardyń resimdeý protsedýralary júrgizilýde», - dedi ol.
Esterińizge sala keteıik, 2009 jyldyń qazan aıynda «Alıansqurylysınvest» JShS-nyń bas dırektory R.Naımanov «Lesnaıa polıana» turǵyn alqabyndaǵy úleskerlerdiń 3 mıllıard 462 mıllıon teńgesin maqsatsyz jumsady degen aıyppen qamaýǵa alynǵan bolatyn. Alaıda, úleskerler men Astana qalasy Qurylysshylary qaýymdastyǵynyń ótinimderi boıynsha jáne qurylystary toqtap qalǵan nysandardy aıaqtaýǵa Úkimetten qarjy bólinetin bolǵandyqtan, R.Naımanovqa qatysty sot úkimi ózgertilip, ústimizdegi aqpan aıynda ol kepildikke bosatyldy. Al qylmystyq is boıynsha tergeý amaldary jalǵastyrylýda.
