Alıans banktiń mınorıtarlyq aktsıonerleri qaıta qurylymdaý jobasyna qarsylyq tanytty
ALMATY. Jeltoqsannyń 21-i. QazAqparat /Erbol Azanbek/ - «Alıans bank»AQ-nyń mınorıtarlyq aktsıonerleri búgin Almatyda baspasóz máslıhatyn ótkizip, qaıta qurylymdaý josparymen kelispeıtindikterin bildirdi,
dep habarlaıdy QazAqparat.
Aktsıonerler tobynyń basshysy Janna Janenovanyń aıtýynsha, qaıta qurylymdaý jobasy boıynsha «Samuryq-Qazyna»UÁQ (67 paıyz) men kredıtorlar komıteti (33 paıyz) banktiń aktsıonerleri bolyp tabylady. «Bul banktiń mınorıtarlyq aktsıonerlerin joqqa shyǵarady. Sondaı-aq josparda «Samuryq-Qazynanyń» 100 jáı jáne kepildendirilgen aktsııasyn satyp alý týraly aıtylǵan, alaıda «Seımar-Alıans» qarjy korporatsııasy» AQ men UÁQ arasyndaǵy kelisimde 76 paıyz aktsııasy satylýǵa jatady dep kórsetilgen», deıdi J.Janenova. Onyń aıtýynsha, qaıta qurylymdaý barysynda mınorıtarlyq aktsıonerlerdiń aktsııalary ne bolatyny týraly eskerilmegen. «Bul aktsııalar satylyp, álde tartylyp alyna ma belgisiz. 15 jeltoqsanda qabyldanǵan qaıta qurylymdaý jobasynda bul kórsetilmegen», deıdi aktsıonerler tobynyń jetekshisi. 6 mınorıtarlyq aktsıonerden qurylǵan top músheleri bul másele boıynsha Almaty qalalyq mamandandyrylǵan ekonomıkalyq sotyna, Medeý aýdandyq sotyna shaǵym túsirgenderin aıtady. Alaıda, qaraýǵa jatpaıdy dep sot shaǵymdardy keri qaıtarǵan. Qazirgi tańda aktsıonerler Almatynyń Aýdanaralyq ekonomıkalyq sotyna shaǵym túsirgen.
1 qazandaǵy jaǵdaı boıynsha banktiń 19,89 paıyz aktsııasy mınorıtarlyq aktsıonerlerge tıesili.
