Alvarestiń komandasy halyqtyń kóńilin basqa jaqqa buryp jiberdi - sarapshy Belenkıı
ASTANA. QazAqparat - Boks salasynyń sholýshysy, tanymal reseılik sarapshy Aleksandr Belenkııdiń oıynsha, Golovkın - Alvares jekpe-jeginde jeńisti meksıkalyq boksshyǵa berip qoıǵan bir tóreshiniń ádiletsiz sheshimi tamasha oılastyrylǵan jospar.
Uıymdastyrýshylar onymen halyqtyń barlyq narazylyǵyn bir adamǵa buryp jiberdi. Al jekpe-jektiń jalpy sheshimi nazardan tys qaldy, dep habarlaıdy QazAqparat tilshisi.
«Adelaıda Berd ol uıymdastyrýshylardyń aldyn ala oılastyryp qoıǵan qadamy, «kemeńger» jospary. Onyń ataq-abyroıy barshaǵa aıan. Buǵan deıin ol ylǵı qısyq sheshimderdi, qarama-qaıshy esepterdi shyǵaryp keldi. Oǵan qosa, Alvareske jankúıer bolyp júr. Ony bári biledi. Demek, onyń jeńisti meksıkalyq boksshyǵa berip qoıatyny belgili. Osylaısha, halyqtyń narazylyǵyn soǵan qaraı baǵyttaýǵa tamasha múmkindik týdy. Barlyǵy ony taptaı bastady. Ol kelinshek óz rólin atqaryp shyqty. Al ony qalaı razy qylǵanyn ózi biledi. Negizgi másele mynada, jekpe-jektiń jalpy ádiletsiz sheshimi nazardan tys qaldy», - deıdi Belenkıı.
Aıta keteıik , ótken demalys kúnderi AQSh-tyń Las-Vegas qalasynda ótken boks keshinde Gennadıı Golovkın meksıkalyq -Saýl «Kanelo» Alvarespen teń tústi. Dál osy sheshimmen jankúıeler de, sarapshylar da kelispeı otyr. Ásirese, 118-110 esebimen jeńisti Alvareske berip qoıǵan Adelaıda Berdtiń esebine narazylyq qatty.
