Alvarestiń GGG-di keketkeni biraz rolıkterdiń ózegine aınaldy
ASTANA. QazAqparat - YouTube vıdeohostınginde Golovkın men Alvares arasyndaǵy jekpe-jekke arnalǵan kezekti promorolık jarııalandy, dep xabarlaıdy QazAqparat tilshisi.
Beınebaıannyń avtory eki boksshynyń nokaýttaryn toptastyryp qana qoımaı, Alvarestiń sońǵy jekpe-jekten keıin Golovkındi keketken jerin de kórsetti. Chaveske qarsy jekpe-jek aıaqtalǵan boıda Saýl Alvares qazaqstandyq boksshy Gennadıı Golovkındi óziniń kelesi qarsylasy retinde tanystyrǵan bolatyn. Golovkın rıngke shyǵyp, suxbat bergende Alvareske sáttilik tiledi. Al meksıkalyq boksshy: «Sáttilik tek ortasha adamdarǵa ǵana kerek!», - dep jaýap qaıtarǵan. «Kanelo» osy sózimen Golovkındi tómendetip, ózin ortasha adamdardan joǵary ekenin kórsetýge tyrysty.
Aıta keteıik, Alvarestiń GGG-di keketken jeri osymen birneshe beınebaıandardyń ózegine aınalyp otyr. Buǵan deıin shyqqan promorolıkterde dál sol sátti daýysyn shyǵaryp turyp, sýbtıtrmen birge bergen. Sebebi Alvares kóbinese óz tilinde sóıleıdi. Sol úshin talaı ret amerıkalyq jýrnalısterdiń synyna ushyraǵan.
