Alvares jeńse, GGG-ge revansh bermeıdi - sheteldik jýrnalıster
ASTANA. QazAqparat - Meksıkalyq boksshy Saýl Alvares (49-1-1, 34 KO) qazaqstandyq Gennadıı Golovkındi (37-0, 33 KO) jeńetin bolsa, oǵan revansh bermeıdi, dep xabarlaıdy QazAqparat tilshisi.
Eki boksshynyń arasyndaǵy kelisimshartqa sáıkes, Alvares utylsa, revansh talap ete alady. Al Gennadıı Golovkınge ondaı múmkindik berilmeıdi. Bul degenimiz, qazaqstandyq boksshy jeńilip qalsa, revanshty talap ete almaıdy
"Negizi, "Kanelonyń" sózine qaraǵanda Golovkınge qarsy ekinshi jekpe-jek bolmaıdy. 16 qyrkúıekte ol Golovkındi jeńip, artqa qaramaı, kete berýdi kózdeıdi. Alvares óziniń sporttyq mansabyn ósirip, orta salmaqta WBO tujyrymy boıynsha álem chempıony Bıllı Djo Sonderspen kezdesýi ábden múmkin, ıa bolmasa, Golden Boy-dyń taǵy bir boksshysy Davıd Lemege qarsy shyǵady. Atalǵan jekpe-jekter de NVO PPV-de jaqsy satylady", - deıdi Boxingnewsresults.com jýrnalısi Manýel Peres.
Al GGG-diń bapkeri Abel Sanchestiń aıtýynsha, aldaǵy jekpe-jek 11-12 raýndqa deıin jalǵassa, revansh uıymdastyrýǵa ábden bolady. "Aldymen jekpe-jektiń qalaı ótetinin kóreıik. Biz 168 fýntqa aýysqansha revansh ótkizýge bolady. Sondyqtan jekpe-jek 11-12 raýndqa deıin sozylsa, rematch uıymdastyrýǵa ábden bolady", - deıdi Sanches.
Aıta keteıik, 16 qyrkúıekte Gennadıı Golovkın meksıkalyq boksshy Saýl Alvarespen judyryqtasady. Osy jekpe-jekte Alvares GGG-diń tek eki ataǵy - WBA men IBF belbeýleri úshin ǵana talasady. Golovkın utylyp qalsa, onyń taǵy eki belbeýi - WBC men IBO bos qalyp, ony basqa boksshylar ózara sarapqa salady. Al qazaqstandyq boksshy jeńiske jetse, tórt belbeýine taǵy The Ring jýrnalynyń arnaıy belbeýin qosyp alady. Atalǵan basylym ony arnaıy Alvares úshin shyǵarǵan bolatyn. Ýaqyt aıyrmashylyǵyna baılanysty Qazaqstanda jekpe-jektiń tikeleı kórsetilimi 17 qyrkúıekte tańerteń bolady.
