Alvares sporttan ýaqytsha shettetildi

ASTANA. QazAqparat - Meksıkalyq boksshy Saýl Alvares Nevada shtaty Atletıkalyq komıssııasynyń (NSAC) sheshimimen ýaqytsha sporttan shettetildi, dep habarlaıdy Sports.kz.

Boksshynyń taǵdyry budan ári qalaı bolatyndyǵy atalǵan komıssııanyń 10 sáýirde ótetin otyrysynda belgili bolady.

Eske salaıyq, naýryz aıynyń basynda Saýl Alvaresten alynǵan dopıng synamalardyń birinen tyıym salynǵan preparat tabyldy. Onyń múddesin qorǵaıtyn Golden Boy promoýterlik kompanııasy boksshynyń qan quramynan tyıym salynǵan preparat - Klenbýterol tabylǵany týraly aqparatty rastady.

Buǵan deıin habarlaǵanymyzdaı, WBA/WBC/IBF/IBO tujyrymy boıynsha orta salmaqtaǵy álem chempıony Gennadıı Golovkın 2017 jyldyń 16 qyrkúıeginde ótken alǵashqy jekpe-jekte onyń qarsylasy Saýl Alvares tyıym salynǵan zattardan «taza» bolǵanyna kúmán keltirgen bolatyn.

Golovkın men Alvarestiń revanshy aǵymdaǵy jyldyń 5 mamyryna josparlanǵan.