Alvares GGG-ge qarsy revanshty keıinge shegerýdiń amalyn tapty
ASTANA. QazAqparat - Búkilálemdik boks uıymy (WBO) óz reıtınginde meksıkalyq boksshyny birinshi orynǵa shyǵardy. Osydan keıin ol orta salmaqtaǵy WBO belbeýiniń mindetti úmitkeri bolyp sanalady, dep habarlaıdy QazAqparat tilshisi.
"WBO reıtıngisinde "Kanelo" birden aldyńǵy shepke sekirdi. Onyń Golovkınge qarsy revanshyn kútip júrgen fanattar úshin bul qýanyshty jańalyq emes. Ony jaıdan-jaı jasap jatqan joq", - dep jazdy TalkSport.com saıtynyń jýrnalısi Maıkla Benson.
Onyń oıynsha, Alvares aldaǵy jekpe-jegin WBO chempıonyna qarsy ótkizýi ábden múmkin. Qazirgi kezde atalǵan tıtýldyń ıegeri - brıtandyq Bıllı Djo Sonders. Alaıda 16 jeltoqsan kúni ol kanadalyq Davıd Lememen judyryqtasady. Sol jekpe-jekte WBO belbeýi sarapqa salynady.
Aıta keteıik, búginde Alvarestiń komandasy Golovkınge qarsy jekpe-jekti keıinge shegerýge bet alǵan tárizdi. Buny kásibı boks salasynyń sarapshylary da baıqap qaldy. Olaı bolsa, 5 mamyrda Golovkın men Alvares arasyndaǵy revansh ótpeýi ábden múmkin. Úsh aptadan keıin Davıd Leme jeńse, Golden Boy oǵan qarsy Alvaresti op-ońaı shyǵara salady. Sebebi Leme de meksıkalyq boksshynyń komandasyna kiredi. Bıllı Djo Sonders tıtýldy qorǵap alsa da, Búkilálemdik boks uıymy (WBO) ony reıtıngte birinshi orynda turǵan boksshymen judyryqtasýǵa mindetteıdi. Buǵan deıin "QazAqparat" osy máselege arnalǵan taldaýdy da usynǵan bolatyn .
