Alvares dopıng qoldandy dep aıyptaǵan Golovkınge balaǵat sózder jaýdyrdy

ASTANA. QazAqparat - Meksıkalyq boksshy Saýl «Kanelo» Alvares dopıng qoldandy dep aıyptaǵan opponenti Gennadıı Golovkınge dóreki túrde jaýap berdi, dep jazady Sports.kz.

Instagramnyń "Stories" bóliminde Alvares jattyǵý barysynan vıdeoúzindilerdi ornalastyryp, astyna balaǵat sózderi bar jazbalar qaldyrǵan. Golovkınge arnalǵan bul posttar, sondaı-aq  «Kanelonyń» múddesine ókildik etetin Golden Boy promoýterlik kompanııasynyń akkaýntynda jarııalandy.

Buǵan deıin habarlaǵanymyzdaı, WBA/WBC/IBF/IBO tujyrymy boıynsha orta salmaqtaǵy álem chempıony Gennadıı Golovkın 2017 jyldyń 16 qyrkúıeginde ótken alǵashqy jekpe-jekte onyń qarsylasy Saýl Alvares tyıym salynǵan zattardan «taza» bolǵanyna kúmán keltirgen bolatyn.

Sondaı-aq Golovkın dopıng daýynan keıin «Kaneloǵa» aıqasýǵa tyıym salynsa, kelesi jekpe-jegin kimmen ótkizetinin aıtty.

Eske salaıyq, naýryz aıynyń basynda Saýl Alvaresten alynǵan dopıng synamalardyń birinen tyıym salynǵan preparat tabyldy. Onyń múddesin qorǵaıtyn Golden Boy promoýterlik kompanııasy boksshynyń qan quramynan tyıym salynǵan preparat - Klenbýterol tabylǵany týraly aqparatty rastaǵan bolatyn.

Golovkın men Alvarestiń revanshy aǵymdaǵy jyldyń 5 mamyryna josparlanǵan.