Áli tolyq zerttelmedi – Aıda Balaeva LGBT-ǵa qarsy petıtsııa týraly qandaı sheshim qabyldanǵanyn aıtty
ASTANA. KAZINFORM – Mádenıet jáne aqparat mınıstri Aıda Balaeva LGBT-ny ashyq jáne jasyryn túrde nasıhattaýǵa tolyq tyıym salý týraly petıtsııaǵa qatysty qazaqstandyqtarǵa úndeý joldady. Petıtsııa bıyl 10 maýsymda jazylǵan.
«Bul másele qoǵamda úlken rezonans týdyryp, qyzý pikirtalasqa jalǵasty. Óıtkeni, qazir memleket tarapynan adam quqyqtaryna kóp kóńil bólinip otyr. Sondaı-aq, qazaqstandyqtar qoǵamdyq mańyzdy taqyryptardy talqylaýǵa jáne memlekettik saıasatty qalyptastyrýǵa belsendi atsalysyp jatyr. Qazaqstanda Prezıdenttik reformalar aıasynda demokratııalyq damý, adam quqyqtaryn qorǵaý jáne zań ústemdigin nyǵaıtý úshin barlyq qajetti zańnamalyq jaǵdaı jasalǵan. Sonyń biri – petıtsııa ınstıtýty. Konstıtýtsııa normalaryna jáne halyqaralyq mindettemelerge sáıkes Qazaqstan kemsitýge qarsy saıasatty júzege asyrady. Ol saıasat negizinde qoǵamdyq-konstıtýtsııalyq kepildik, janjal týdyrmaý jáne toleranttylyq saqtaýdy qamtamasyz etý mindettelgen», - dep úndeý jasady Aıda Balaeva Facebook paraqshasynda.
Mınıstrdiń aıtýynsha, LGBT-y ashyq jáne jasyryn túrde nasıhattaýǵa tolyq tyıym salý týraly petıtsııaǵa qatysty qoǵam pikiri ekige bólingen.
«Jumys tobyna qoǵamnyń túrli toby arasynan 45 adam kirdi. Atap aıtqanda, quzyrly memlekettik organ ókilderi, Parlament depýtattary, qoǵamdyq birlestikter ókilderi men sarapshylar jáne múddeli taraptar qatysty. Osylaısha qoǵamdyq kóp bóligi máseleni talqylaýǵa belsendi atsalysty. Jumys tobynyń eki otyrysy jáne aýqymdy saraptamalyq talqylaýlar ótkizý kezinde ótinish boıynsha kelip túsken eskertýler taldanyp, júıeli jumys júrgizildi. Ulttyq jáne halyqaralyq normatıvtik-quqyqtyq aktilerge salystyrmaly taldaý jasaldy. Petıtsııada kóterilgen máselelerdi retteýde halyqaralyq tájirıbe zerdelendi. Jetekshi ulttyq ǵylymı zertteý uıymdarymen jáne sarapshylarmen keńes ótkizildi. Petıtsııa taqyryby boıynsha halyqaralyq jáne qazaqstandyq úkimettik emes uıymdardyń usynǵan pikirleri, usynystar men dálelderi, zertteý materıaldary men úndeýlerdiń barlyǵy nazarǵa alyndy», - deıdi ol.
Sondaı-aq, vedomstvo basshysy joǵaryda atqarylǵan jumystardyń petıtsııa boıynsha túpkilikti sheshim qabyldaýǵa jetkiliksiz ekendigin aıtty.
«Degenmen, bul jumys petıtsııa boıynsha túpkilikti sheshim qabyldaýǵa jetkiliksiz. Zertteýler men talqylaýlar qazirgi ýaqytta bul baǵyttaǵy aýqymdy jumystardy jalǵastyryp, máseleni jan-jaqty zerdelep, ony retteýdiń naqty tetikterin ázirleý kerektigin kórsetti. Bul ýaqytty qajet etedi. Degenmen, Mádenıet jáne aqparat mınıstrliginiń ustanymy kámeletke tolmaǵandardyń quqyǵyn qorǵaý jáne qaýipsizdigin qamtamasyz etý turǵysynan, balalarǵa jynystyq qol suǵýǵa qarsy qylmystardyń ósýi aıasynda jasóspirimder men balalardy jynystyq qatynastardy otbasynyń ishinde dástúrli emes qatynastardy nasıhattaý men kýlt jasaýdan qorǵaý talaby ózekti ári qajet. Balalarymyzdyń aqparattyq qaýipsiz ortada ósip, damýy asa mańyzdy. Bizdiń urpaq aldyndaǵy paryzymyz olarǵa durys rýhanı, adamgershilik baǵyt-baǵdar berip, dástúrli otbasylyq qundylyqtardy boıyna sińirý. Sondaı-aq, ulttyq mádenı murany ustanýǵa, genetıkalyq kodty saqtaýǵa jaǵdaı jasaý óte ózekti», - deıdi A.Balaeva.
