Alpi kýrorttarynda myńdaǵan týrıst qar qursaýynda qaldy
ASTANA. QazAqparat - Ótken demalys kúnderi Germanııa men Aýstrııanyń shekaralyq aımaǵynda tolassyz qar jaýdy. Bul týraly Der Tagesspiegel nemis basylymy habarlady.
Alpidegi kóshkin qaýiptiligi saldarynan jeksenbi keshkisin Aýstrııa bıligi basty joldardyń birin jaýyp, 17 myń adam turatyn Zaltsbýrg provıntsııasynyń syrtqy álemmen baılanysyn toqtatty.
Sondaı-aq, Raýrıs eldi mekeninde 2 myń týrıst pen 3 myń turǵyn qar qursaýynda qaldy. Sondaı-aq, Ýnken, Lofer, Sen-Marten jáne Vaısbah shekaralyq qalalary osyndaı jaǵdaıǵa tap bolyp otyr.
Sınoptıkterdiń boljamy boıynsha, búgin Alpidegi tanymal taý shańǵysy kýrorttarynda bıiktigi bir metr bolatyn qar jaýady. Budan bólek, boran men burqasyn bolady.
Eske sala keteıik, Eýropanyń kóptegen aýdandaryn qalyń qar basyp qaldy. Saldarynan joldar, temirjoldar jabylyp, mektepterde sabaqtar toqtatyldy.
